Aizawl : New Delhi-a NITI Aayog Governing Council Meeting-ah chief minister Zoramthanga chuan Mizoram mamawh hrang hrang a thlen.
Inrinnia NITI Aayog Governing Council meeting thutkhawmah Zoramthanga hian state pum hmasawnna atana hmasawnna ruhrel lian tak tak din ngaihpawimawh a nih thu leh, hemiah hian inkalpawhna lama hmasawnna, rel kawng te, national highway leh a dangte chuan sumdawnna leh a kaihhnawih dangah hmasawnna a thlen tel zel tur thu a sawi.
Zoramthanga hian hmasawnna ruhrel daihrei tur dinna atana sorkar laipuiin Special Assistance to States for Capital Investment (SASCI) scheme a duang chu lawmawm a tih thu a sawi a. State te’n tangkai zawka an hman leh theih nan he scheme hnuaia part-I a kaihhruaima inziak thenkhat chu a aia khirhlo zawka siamthat ni se tiin rawtna a thlen a. Hemi bakah hian sorkar laipui scheme thenkhat hnuaiah land acquisition atana a hranpa a sum dah a nih loh avanga harsatna awm thin chu sutkian ni se a duh thu a thlen.
State chhunga Healthcare infrastructure in duhthu la sam tawklo mah se Mizoram chuan naupang za zaah Rotavirus hri danna a pekchhuah tawh thu leh, ram chhunga Infant Mortality Rate hniam ber a nih thu a sawi a. Lawngtlai, Siaha, Serchhip leh Mamit district hospital te chu tihchangtlum a thuamthat mamawh a nih dan te, Community Health Centre-te chu First Referral Unit ni tura tihchak a pawimawhna te a thlen bawk.
Mipui hmathatna turin leh a bik takin mahni kutkawih a eizawngte puih a tihhmasawn nan state flagship programme SEDP kalpui mek a nih dan chief minister chuan sawi bawkin, an eizawnna chawisan a nih a, an sum lak luh a lo tam zawk nan trade 52 laiah incentive pek a nih dan te a sawi bawk.
Hmeichhiate dinhmun chawikan kawnga Mizoramin hma nasa taka a sawn dan sawi bawkin Chief Minister chuan, district tina Working Women Hostel sakna tur sum pek mamawhna te leh sumdawng hmeichhia te’n an hman tangkai tur nau enkawlna (creche) siam tul thu te a sawi.
Hei bakah hian Chief Minister chuan mahni sahimna zawnga Mizorama raltlan te dinhmun leh state sorkar leh mipuiin an lo dawnsawn dan te a sawi lang bawk a ni.
NITI Aayog Governing Council meeting hi Prime Minister Narendra Modi, NITI Aayog chairman ni bawk chuan a kaihruai a; Chief Minister hi Mizoram Chief Secretary Dr. Renu Sharma in a tawiawm a. Kumin Governing Council meeting thupui chu ‘Viksit Bharat @2047: Role of Team India’ tih a ni.