Aizawl : Sorkar laipui hnuaia Ministry of Power Secretary Alok Kumar chuan Inrinni khan Mizoram Power and Electricity Department buatsaih Work review Meeting a hmanpui.
Thutkhawmah hian Alok Kumar chuan India sorkarin mitin tan an nitin khawsak rel kawnga kawlphetha eng a pawimawh zia a hria a, kawlphetha chhit man tlawm, mitin thleng zo leh boruak ti bawlhhlawh lo mipuite hnena thlen hi a tum ber pakhat a nih thu a sawi.
India Energy Transition chungchang pawh sawiin sorkarin thingtlang kilkhawr thleng phak kawlphetha quality tha pek leh kawlphetha eng chhitin a behbawm zawng zawng chu mipuite tana phurrit lutuk ni lo va , a pe chhuaktu inchawm zo tho si pek chhuah hi a ngaih pawimawh ber zing a mi a nih thu a sawi.
Mizoramah eng lakna chi hrang hrang a awm nual a, chung zingah chuan pump storage system hmanga kawlphetha siam chhuah chu nakina India energy transition chungchangah pawh ram pum entawntlak a la nih theih thu sawiin, Smart prepaid metering chu a pawimawh avangin hun lokal zel turah Mizoram chu zaa 90 billing efficiency thleng tura hma la turin a fuih bawk.
P&E Secretary H. Lalengmawia pawhin thu sawiin, RDSS scheme chu sorkarin a bawhzui mek thu a sawi a. Smart metering ah bidding process in hun a duh rei deuh a, amaherawhchu tun dinhmun ah chuan June 15 hun tiam ral hma a ruahmannate peihfel a hna tan ngei a nih a beisei thu a sawi.