Social media-a tun hnaia lar tak, pawngsual video-a mipa pali leh hmeichhe langte chu Ningani khan Bengaluru-ah man an ni.
Pawikhawihna hmun hi Old Madras Road, Ramamurthy Nagar a ni.
Video hi a darh chak hle a, a bikin hmarchhakah a darh chak a. Assam police phei chuan video-a lang mi pangate hi an thlalak tar langin an awmna chin hrilh thei chu lawmman atan pawisa pek an intiam.
An mi mante zingah Sagar (23), Mohammed Babu Sahik (30), Ridoy Babo (25)-te chu Bengaluru-a chengte an ni a, Hakil (23) leh hmeichhe pakhat a hming police-in an tar lan lohte chu Hyderabad-a mi an ni thung.
Bengaluru police-te chuan pawikhawihna hi kar hmasaa thleng kha niin an sawi a. An pawngsual hi mihringa sumdawnna tuartu niin an sawi.
“Pawikhawihtu mi panga leh pawngsual tuartu hi Bangladesh mi an ni a. Pawikhawihna erawh hi chu Bengaluru-a thleng a ni,” tiin police-ten an sawi.
An man zinga mi hian video-in an pawikhawih lai hi lain kar hmasa khan social media-ah a tar lang a. Video-ah hian rawng taka hmeichhe serha bottle an thun lai pawh a lang.
An awmna hmun hrilhtu an awm hnuah police-te hian Ramamurthy Nagar-ah an man a. An pawngsual erawh state thenawma a tlanchhia chu thu zawh fiah turin Bengaluru-ah an hruai let.
Ramamurthy Nagar police-te chuan mi pangate lakah hian pawngsual leh tharum thawhna thubuai an siamsak.
An pawngsual hi sumdawn nan Bengaluru-ah an hruai a, chhuak ruin Kerala-ah a tlanchhia a, Bangalore-ah an hruai kir leh ta a ni.
Jodhpur-ah tun hnaia Nagaland nula inthat chu he pawngsual nula hi a ni tiin social media-ah a lar hle hluai bawk a; mahse, mi thuhmun erawh an lo ni lo thung.