BJP Mizoram Vice President Vanramchhuanga chuan Mizorama BJP te hi ram siam thatna tura ding an nih thu leh an din chhan ang ngeiin ram, hnam leh sakhua himna turin theihtawpin hma an la zel dawn tih a sawi.
Nimina an pisa-a chawlhkar thar inhlanna leh political session an neihah Vanramchhuanga hian, Mizoram BJP te hi Hindu BJP an nih loh thu leh Kristian BJP an ni thu a sawi a. Mizoramah hian BJP an din chhan chu Mizoram-in hmasawnna tha zawk leh mipuite mahni ke-a ding thei tura central BJP kaihhruaina hnuaia hma lak hi an tum a. Chumai bakah BJP kaltlanga Kristianna tha leh dik an tihlan theih nana hmalak hi an tum tih a sawi.
Vanramchhuanga chuan Mizorama sorkar mek leh sorkar tawhte enin a lang maia Kristian, chhungril lamah milem bia nun neih avanga Mizoram hian hmasawnna a hmuh tur ang a hmuh theih loh phah tih a sawi a. Milem biate pawh tluk lo va, eirukna avanga hmingchhiat mai bakah Pathian hming thlenga sawichhiatna remchang awm te pawi a tih thu a sawi.
BJP Mizoram chuan an awm chhan leh Mizorama an din chhan, Mizoram leh hnam, sakhua a himna turin theihtawpin hma an la zel dawn tih sawiin Vanramchhuanga hian, “Manipur buaina avanga kan chipui te’n harsatna an tawhnaah pawh BJP Mizoram chu kan tlanchhe dawn lo va, kan dinna hi Mizoram mipui te hian min thlawp zawk turin kan ngen che u a, a chhung atanga hmalak hi a sawtin kawngro pawh a su hle a, hma kan la zel dawn a ni,” a ti.