Aizawl: May 27 leh 28 khan Mizo Society of America (MSA) huaihawtin Indianapolis, Indiana, USA-ah Chapchar Kût hman a ni a. Central YMA General Secretary Prof Lalnuntluanga’n a hman pui.
Kût 2023 hmanah thupui, ‘Zofate Inpumkhatna’ hmangin Prof Lalnuntluanga chuan, “Mizote khawi hmunah pawh awmin ram hrang hrangah ram mi nihna neiin, ramri kar danah awm mah ila Chhinlung chhuak unau kan nihna hriat leh vawnhim tlat a tul a. Zofate kan inpumkhat nan Zohnahthlak hnam hrang hrang hruaituten mawhphurhna kan nei lian em em a ni,” tiin inpumkhatna nei tura mawhphurhna hlen chhuak turin a sawm.
Kût lawmnaah hian football leh volleyball hmanga inelna neih a nih bakah hnam lâm, zaia intihhlimna buatsaih a ni.
Central YMA GS leh MSA hruaitute inkawmin thawhho dan turte an sawiho a. MSA hian CYMA in tanpuina hna an thawhna atan a tul atan Rs 10,00,000 an rem ti.
North America Mizo Christian Fellowship (NAMCF) hruaitute nen inkawm bawkin NAMCF-te chuan CYMA-ten a tula an hman turin US Dollar 5,000 (Rs. 4,13,000) pek an remti bawk.
CYMA GS hian tun chawlhkarah Chin kohhran hruaitute leh Zohnahthlak pawl hrang hrangte a kawm bawk ang.