Infiammite hi man beha bus-a phurh sawn an ni lai video a darh nasa hle a, infiammi langsar tak tak leh eptu politician-ten an sawisel nasa hle.
Olympic medallist Neeraj Chopra chuan kawngpuia Phogat unau an thu lai police-in an pawt sawn video chu, “A lungchhiatthlak hle a ni. A aia thaa indawr dan a awm,” tiin a tar lang.
Indian football team captain Sunil Chhetri pawhin, “Engvangin nge sawiho awm lova kan wrestler-te hetianga hnuh sawn an nih? Hetiang hi chu tute chungah mah tih ngai a ni lo,” a ti bawk.
Eptu hruaitu hrang hrang, Congress hruaitu Rahul Gandhi leh Delhi Chief Minister Arvind Kejriwal te pawhin police chet dan hi an sawisel bawk.
Wrestler-te hian January khan tuna an thil phut tho lantir hian lungawi lohna an lo lantir tawh a, sports ministry chuan Singh-a hi a nihna chelh rih lo turin a ti a, sorkarin an chhui dawn tih a sawi bawk.
Wrestler-te hian April thla khan Singh-a hi man ngei phutin an inhawr khawm leh a. Police pawhin a lakah hian thubuai pahnih siamsakin pakhat zawk chu Pocso (Protection of Children from Sexual Offences) Act hmanga siamsak a ni.
Singh-a hi police pawhin thu an zawh tawh a, an la man lo thung.