Jammu & Kashmir-ah kumin chhung firfiaka chetna chu 25% zetin nikum tun ang hun thleng aiin a tlem zawk a. Kuminah hian Kashmiri thalai 20-in firfiak pawl an zawm tawh a, nikum khan 167-in an zawm.
Sorkar laipuia venhimna lam buaipuitute chuan kuminah hian firfiak chetna vawi 43 a thlen tawh thu an sawi a, nikum tun tun ang hunah khan 58 a thleng hman tawh.
Kuminah hian civil mi pakhat a thi a, nikum khan paruk an thi hman tawh thung.
Tual chhung mi thalai, an chin hriat lohva bo, firfiak pawl an zawm ni ngeia rin pakuate an lo kir tawh bawk.
Kuminah hian thalai 20-in firfiak pawl an zawm tawh a, heng zinga pariat vel chu thah an ni tawh.
Inbeihna thlenna hmuna venhim hna thawktuten an ngenna zawma thuneitute hnena inpe mi firfiak 15 an awm tawh bawk.
“Dan leh thupek kengkawhtuten hma an lakna avangin firfiak pawl zawm thalai pawh an tlahniam hle a. Kum 2018 lakah phei chuan Kashmiri thalai zinga firfiak pawla tel ta hi an tlem tawh hle,” tiin J&K DGP Dilbag Singh chuan a sawi.
Kum 2020 khan thalai 201 zetin firfiak pawl an zawm a, kum 2021-ah 140 leh nikum khan 167-in an zawm.