- Mahmuaka Chhakchhuak
Kum 1890 ah Kristiannain kan ram a lut tan kan tiin hemi atang hian kristian kan niin kan inchhal a, chu chuan kan khawsak dan engkimah danglamna min thlen nghal bawk a. A thatna tam tak kan hmuin kan hria a, kan khawsak phung mumal lo leh awmze nei lo tam takte ngei pawh chuan awmzia a rawn nei chho telh telh bawkin kan inchei dante thlengin kan lo danglam ta. Nimahsela chutih lai chuan kristianna chi rawn tuhtute zia kan lak lutukna lamah kan hnam zia tam takte erawh chu kan bosal phah thung a, vawiin thlengin hnam zia lanna tur tam takah khawthlang zia a lang ta zawk a, sakhaw rawngbawlna thleng thlengin an tih dan chu dik bik zawk tura ngaihna lian tak kan lo neih phah ta zel bawk a nih hi.
Kristianna hian thlarau lam nun chauh niloin khawtlang nun leh mimal nun thlenga a khawih danglam tur a nih laiin keini chuan kan thlarau lam nun emaw chauh kan khawih tir niin a hriat a. A chhan pawh khawtlang nun leh mimal nunah chuan kristianna lam ai mahin changkang zawk nia kan hriat leh khawthlang mite tih dan kan entawn nasa zawkin chulam chu kan senglut nasa zawk mah a. Hmasawnna lamah kan intlansiak a, tupawh mai hian mahni neih ang tawka nun kan thiam loin kan neih phak bak baka nun kan hreh lo a, chumi kawngah chuan thinlung pawh kan pek nasat bawk avangin hei hian kan thlarau nun thleng pawhin a chhiat phah em ni ang a tih theih bawk ang. Chu chauh ala niloin thenawmte er ranin kan awm a, thenawmte’n TV an neihin neih ve kan tum a, Fridge an neihin neih ve zel kan tum bawk a, kan mamawh loh thleng thlenga neih kan tumna chhan hi intlansiakna kawng dik lo kan zawh vang zawk a ni.
Khawtlangah ngei pawh kan kristianna hian hmun pawimawh a chang zo tak tak lo a, khawtlang huapa punkhawmna hmunahte chuan kan sakhaw puithiamte chu kan han dah pawimawhin hunserh hmangtu atante kan han ruat a, nimahsela hei pawh hi a mawihnai maia ruat kan ang thin mah zawk. Politics lam hawia punkhawmna hmunah ngat phei chuan kum tam tak atang tawha Pathianthuin min lo chiah zawp tawh bawk si avangin kan panna lai leh nek kan nawmna hmanrua ber Pathianthu hmangin kan Politiciante chuan thiam takin thu an sawi a, tawngkam thiam taka an han sawi phei chuan kan pawm leh mai thin a nih hi. Hei hi vawiin thleng kan kal dan a niin hetiang reng hian kum tam tak pawh kan la kal reng dawn pawh a ni mai thei a, chu chuan mizote hi pawnlannaah min hruai zel zawk dawn pawh a ni thei. Nun nghet cherh chawrh kan nei thei reng reng lo a, langlo ruama phei chuan ringlotute tih awm tak tak pawh kan ti hreh chuang lo a nih hi maw.
Kan sakhaw puithiam thenkhatte ngei pawhin an nihna leh rawngbawlna chu thiam taka hmangin Politiciante lakah inpholanna atan an hmang a. An dik lohna lai leh ro an rel sualna laia zilh leh hauh lam ai mahin anmahni laka tlaktlum an tum emni zawk tih turin Politiciante kiangah za vak loin an va nui lui vel thin a. Baptistu Johana ang erawh kha chu kan sakhaw puithiam zingah hian an awm lo a nih ber hi maw. A ni chuan Lal Isua kawng alo sial saknaah Simna thu a tlangaupui a, taninah tan tir a niin a lu an tansak nghe nghe a nih kha. Thuthlung Hlui lamah ngei pawh sakhaw rawngbawltu huaisen tak tak kan hmu bawk a, anni chuan khawvel lalte chu Pathian avang zawkin huaisen takin thu an sawi khum thin zawk a ni. An nihna leh an rawngbawlna ber midang kaihhruai leh thlarau lam nun chakna atana midang zirtirna chu khawvel hruaitute kiangah chuan theihnghilha zahna chibai buka an va kaikun ta zawk hi an tih loh tawp tur a ni.
Kan kristianna hian dawihzepna kawngah min hruai zawk a, kan kristianna hian Krista anga tlawmna ruama min hruai tak tak bawk si loh avangin Mizo kristianna hi ram dang kristianna nen chuan a in ang thei lo a, anni aiin kan danglam bik a ni. Chakma rama Buddhist sakhua a lut hmasa zawk angin kan ramah hian kristianna niloin sakhaw dang rawn thleng hmasa zawk nisela keini pawh hian thuawih takin kan lo pawm mai awm mange a tih theih bawk ang. A chhan pawh tih kan nuam a, engmah kan uksak tak tak lem lo a, ngaihtuah chianna tak tak kan neih ngai loh avang hian kaihhruai pawh kan nuam ang reng phian thin. Sawi tawh angin kan mizo society tha tak tak te pawh vawng nung reng turin kan kristiannain min chiah hneh tawh bawk siin, kan kristianna chu kan dah chungnung zawk tlat si a, chuvangin kan hnam zia rang lam reng reng chu vawiin thlengin kan lo hnawl ta zawk zel a nih hi.
Vawiin thlenga Laltawngtaina pawh la sawi rual hleithei lo kan nihnaah hian kan mizo kristiannaah hia kaihhruaina mumal tak leh khawng tak kan nei lo em ni a tih theih bawk a, kohhran hrang hrang lo awmna chhan leh kan inlak hranna chhante ngei pawh hi thutak lam vang zawk ai mahin kan mihrinna vang zawk hi a nih ngei a rinawm. Hmangaih rawngbawl tur kan nih laiin member kan inruk sak a, mahni huang chhungah chuan kan in la lian leh em em thung bawk si. Thlarau lama thanlenna aiin ropui leh lansarh kan duh zawk em ni tih turin hmun tinah Biak In lian tak tak kan sa a, a thente phei chu hmuhnawm thamin a ropui bawk a, hengte hi kan sawisel erawh a ni hauh lo nain a aia pawimawh zawk kan hlamchhiah tlat hi chu a dik thei lo a ni. Krista anga tlawm ngam tak tak turin kan sakhaw puithiamte hian hmahruai ngam sela chuan mizo kristianna hian hei aiin hma a sawn ngei zawk awm e.
Sual palzam kan sam a, mahni hlawkna turah chuan midang tih retheih pawh kan hreh chuang hauh silote hi tun huna mizo kristiante mizia a nih tlat bawk si avangin kristian ram kan intihna ngei pawh hi nakin lawkah chuan ala zahthlak zawk mai thei hial awm e. Chuvangin kohhran lama rawngbawlna chanvo nei chin te tal chuan a theih chin chinah thianghlim tumin leh midang entawn tlak turin nun fimkhur theuh thei ila awmzia a awm deuhin a rinawm. Chutiang a nih loh chuan thli thawtna lam apiangah kan thle mai mai thin bawk siin engmah hi kan sawi rei tak tak peih loin engmah hi kan tuipui rei tak tak peih ngai si lo a, kan sakhuana ngei pawh hi sawinghinin ala awm mai palh ang tih pawh hlauhawm tak a ni.