Formula One world champion ni lai Max Verstappen-a’n Monte Carlo kawtthlerah, ruahin a nghawng intlansiak chu harsatna lian nei lovin a thunun tluan a, Monaco Grand Prix-ah hnehna changin drivers’ championship-ah a hmahruaina ti sang zual.
F1 calendar a intlansiak ngaihhlut bera chhal ngam, tlankawng zim leh hautakah Verstappen hian a tir atang hma hruaiin a tlan tluang viau a, intlansiak tawp lamah erawh ruahsur in thil a nghawng thui.
Nimahsela Dutch driver hi a tawp thleng chesual lovin tlan tluanin tun season-ah a vawi li nan pakhatna a hauh.
Verstappen a vannei
Inrinni qualifiying-ah inelna boruak a ‘hot’ viau. Charles Leclerc, Fernando Alonso leh Verstappen te tlanchak ber an nih vek hnuah Red Bull driver in pakhatna a hauh. Pathianni ah a hma ber atangin bul a tan.
Monaco tlankawng hi khawpui chhung kawng a ni a, a chep avangin intlanpelh a har. A hmasa a awmten tihsual an neih loh chuan an chan a tha.
Verstappen-a’n bul a tan tha, hma hruai nghalin tibuai pha an awm lo. Lap 50 an tlan tling chho tihin ruah a tla tan. Hetah hian Aston Martin in thutlukna an siam fuh lo.
Driver dangten tlankawng huh tan avangin ‘intermediate tyre’ a an inthlak laiin lap 53 naah Alonso an ko lut a, a car-ah ‘slick tyre’ pangngai an la vuahsak.
Hetah hian ‘intermediate tyre’ vuah nghal nise kawng huh vanga talbuai Verstappen-a’n a tyre a thlak chhungin pel thei a ni. Mahse ruah a tlak tam zel avangin Alonso hian lap 55-naah a ke a thlak leh a ngai ta zawk. An huntha an hloh.
“Kawng a huh khan a nal em em a, kha vang khan hmahruaitu nih bawk chuan fimkhur a ngai. Tlan chak vak a ngamawm loh a, chutihlaiin a muanchan theih loh. A harsa a, mahse Monaco a intlansiak hi a awl ngai lo hrim hrim.” tiin Verstappen chuan a thlirlet.
Intlansiak zawhah Alonso erawhin an an ‘race strategy’ chungchanga an team thutlukna siam dan chu sawisel duh lovin an zawh zuina a chhang duh lo thung.