India khawpui, Delhi-a police-te chuan lungawi lohna lantirtute lakah thubuai siamin an zingah hian a ram chhunga wrestler lawk ber ber, lungawi lohna an lantir laia an hrente pawh an tel.
Olympic medallist Sakshi Malik leh Bajrang Punia te pawh Pathiannia parliament building thar hawn laia helai hmun thleng kawng zawh tum hren zingah an tel.
A hnu zanah chhuah leh an ni thung.
Police chuan Delhi-a lungawi lohna an lantirna hmun atangin an um chhuak a; mahse, wrestler-te hian an kir leh tho tur thu an sawi.
Pathianni chhuna police-in an lak hnua zana an chhuah leh hnuah Punia chuan thuthar lakhawmtute hnenah, “Dikna hlenchhuahna kan hmuh hma chuan kan haw chhan tur a awm lo,” a ti.
World Championship-a medallist vawi hnih lo ni tawh, Vinesh Phogat leh a laizawn, Sangeeta te pawh police-in an hren zingah hian an tel a. Malik-i te nen hian zanah chhuah an ni chauh.
Delhi police thuneitu chuan wrestler-te hian lungawi loh lantir hi an dil a niha ‘Janta Mantar ni lova lantir’ an tum a nih chuan phalsak an ni dawn tih a sawi a. Jantar Mantar hi Delhi-a hmun hlun leh pawimawh tak niin hetah hian wrestler-te hian thla chuang lungawi lohna lantirin an lo inkulh tawh.
“Wrestler-te hi Jantar Mantar-ah ni 38 chhung an mamawh ang zawng zawng pek an ni a; mahse, nimin kha chuan an hnena ngenna kan pek zawm lovin dan an bawhchhia a ni,” tiin , Delhi Police Deputy Commissioner Suman Nalwa chuan a sawi.
Wrestler-te hian buaina siam lova parliament thleng kawng zawh an duh a, phalsak an ni lo va. “Buaina kan siam lo va, vantlang thil engmah tihchhiat kan nei lo bawk,” tiin Indian hmeichhe wrestler zinga Olympic medal la thei awm chhun la ni, Malik-i chuan a sawi.
Wrestler-te hian April 23 atang khan an pawl (federation) chief, Brij Bhushan Sharan Singh-a lakah lungawi lohna lantirin infiammi hmeichhiate lakah mipat hmeichhiatna rawngkaiin chet a thawh niin an puh.
Rorel lai, BJP hruaitu, MP huhang ngah tak, Singh chuan an puhna hi phain ‘politics thil atanga irh chhuak’ mai mai niin a sawi ve thung.
Pathianni khan Jantar Mantar atanga kilometre tam lo taka Prime Minister Narendra Modi-a’n parliament building thar a hawn laiin lungawi lote leh police hi an innawr ta a. Police chuan wrestler-te hian an thupek an zawm lo va, an hungna paltlang tumtute chu an hreng ta niin an sawi.
Video darhah chuan wrestler-te hian hungna (barricade) chu an lawn liam a, thuneituten lo dangin an la sawn tih a lang.
Delhi Special Commissioner of Police Dependra Pathak chuan, “Dan an bawhchhia a ni,” tiin tual chhung chanchinbute hnenah a sawi.
Hetih lai hian Malik-i chuan ‘ngawi rengin an kal’ a, police hian ‘lo man betin tharum nen an man’ tih a sawi a, khawiah nge an kalpui dawn tih pawh an sawi duh lo niin a sawi ve thung.
“Khawvel pumin sorkarin a player-te a tih dan hi an en thup,” tiin Vinesh Phogat-i chuan Twitter-ah a tar lang ve bawk.
Pathianni zanah khan police hian Malik, Punia, Phogat unau leh ‘lungawi loh lantir huaihawttu dangte’ lakah thubuai a siam ta a. Buaina siam, dan lova pung khawm leh sorkar hna thawkte an hna thawhtir thei lova siam thubuai siamsak an ni.