Aizawl : Ram mipuite duh leh hmuh chak ber mipui sorkar dik tak din turin ZPM-ah mipuiin rinna an nghat fel tawh niin ZPM Secretary General PC Vanlalruata chuan a sawi.
Thawhtannia ZPM in a pisa-a chhung inkhawmah PC Vanlalruata chuan kum 37 tehmeuh party pahnih ro an inrel chhawkna hnuaiah ram dinhmun chu mipuite’n an hre tlang vek a. Tunah hian mipuiin sorkar siam turin ZPM an beisei mek a, an beisei chhan chu MNF leh Congress nin tawh vang a nih theih thu leh ZPM Leader Lalduhoma hi enchhin hrim hrim duh pawh mi thahnem tak an awm bawk tih a sawiin, “Kan sorkar lo hrawn tawhte mipui sorkar aia party sorkar dintu an ni a, mipui sorkar tak tak hi mipui hian hmuh an chak tawh a ni,” a ti.
PC Vanlalruata chuan tun lai hian sum leh pai hman dik lohna avangin rorel lai MNF party an buai hle a. Chhung khat laina induhsakna uchuak avangin party workers tam tak an beidawng mek a. Chief Minister ni mek leh Minister thenkhat mahni bial ngaia ding nawn ngam lova bial dang zawng mek an kat nuk bawk, a ti a; Congress pawhin chhungkuaah harsatna namen tawk mekin, team thar din tum leh MLA hlui rual an in mu leh ar mek tih a sawi a. He’ng boruak zawng zawng hriat hian ZPM tan kawl a eng hle a, chutihrual chuan Pathian duh anga an party-in ke an chheh fuh loh palh chuan chunglam hian sorkar a pek loh theih avangin hruaitute rorel ngaichang thiam nih tum a, thuawihna tel lo chuan Pathian thuah leh politics-ah hian thil ropui a thleng thei lo niin a sawi.
ZPM chhung inkhawmah hian PAC member Lalmuanpuia Punte pawhin Manipur-a thil thleng chungchang a sawi fiah bawk.