Aizawl : BJP Mizoram Vice President Vanramchhuanga’n BJP Mizoram chu Mizo hnam leh ram, Zohnahthlak te tana ding an nih angin tlang hrang hranga Zohnahthlakte tan a tlanchhe ngai dawn lo tih a sawi.
BJP Mizoram hian zirtawpni khan an pisa-ah Friday Political Session an hmang a. He hunah hian Vanramchhuanga chuan, “BJP Mizoram chu Mizo hnam leh Zohnahthlak te tana ding kan nih angin, Zohnahthlak hmun hrang hranga mite tana awm leh ding kan ni a, Zohnahthlak hnam hrang hrang te’n harsatna kan tawh hunah kan awm mai mai ngai lo va, kan awm mai mai ngai dawn bawk hek lo a ni,” a ti.
Manipur buaina avanga Zohnahthlak tam takin harsatna an tawh chungchangah BJP Mizoram chuan State Executive neih zawh takah, resolution siama an Pass tak te kha an dinchhan a nih angin Zohnahthlakte tan BJP Mizoram chu an tlanchhe lo va, an tlanchhe ngai dawn hek lo tih a sawi.
Vanramchhuanga chuan Manipur buaina chhuah avanga sakhaw biak in hrang hrang tihchhiat a ni chu an dem takzet tih a sawi a. Mizoramah BJP sorkarna phei se tun aia nasa zawkin Zohnahthlak hrang hrang te tan an tangkaiin, an thawk na leh zual thei dawn a, Mizoram mipui leh Zohnahthlak te tan tangtai tak leh awmze nei taka hma an lak theihna turin BJP hi an luhchilh a, a chhung atanga hma an lak hi a pawimawh hle tih a sawi bawk.