Karliamta San Siro inkhelah 3-2-a an mikhual Atalanta hnehin Inter Milan chuan top four luah chungin Serie A season an khar thei dawn tih a chiang tawh.
Simone Inzaghi team hian khelh khat la awmah point 69 neiin table-ah pathumna an luah a, pangana luahtu Atalanta nen point riata inthlau tawhin, an chung chiaha pahnihna luahtu Lazio lakah Inter hi point hnihin an hniam thung.
Inkhelh banah Inter squad chuan an manager Inzaghi hi an vawr chiam a, hun harsaa a hruai danah an fak.
Inrinni zan inkhelah mualneitu team-in bul an tan puak tha hle a, tan atanga second 39-na lekah Romelu Lukaku chuan goal hmahruai thunin, chumi atanga minute hnih tling chang changah Nicolo Barella chuan Federico Dimarco thawhrah atangin home team hmahruaina a belhchhah.
Tun kha kum 82 chuang tehreng chhunga Internazionale-in Serie A match bika a tir lam minute thum chhunga goal hnih an thun
vawikhatna a ni.
Minute 10 khelh tlin hmaa goal thum khung thei tur an nih laiin Hakan Calhanoglu goal chu offside vanga hnawlsak a ni.
Sihnih an chhuah hnuah Atalanta an harhchhuak ve tan a, Rasmus Hojlund leh Teun Koopmeiners-te’n goal thun theihna hun tha neiin, Inter goalkeeper Andre Onana an paltlang zo lo.
Minute 36 an khelh tlin rualin Mario Pasalic chuan Atalanta siphurh pakhat a sut then a; mahse, Inter bawkin second half-ah inkhel an thunun zui leh nghal.
Minute 13 chiah awm tawhah hnai set sawt atanga goal khungin Lautaro Martinez chuan 3-1-a Inter hmahruaina goal a thawh ve leh a; hun pekbelhah Luis Muriel free-kick chhuih chuan wall fuhin, chumi hnua a shot chuan goal kham a per a, ball sawtlet chuan Onana fuhin mikhual goal hnihna a lut a, mahse, Atalanta siphurh sut zo turin hunin a daih ta lo.
Champions League final khel tur Inter Milan hian June ni 10 Istanbul khaw final-a Manchester City an hmachhawn hmain league match vawikhat khelh tur an la neihah kartawp Inrinni zan hian Torino an luhkhung leh phawt ang.