Kumin kum tawpah hian kum nga chhunga kan ram hruaitu tur kan thlang leh dawn ta a. Inthlanpuia kan hruaitu thlan fuh leh fuh loah hma lam hun tur a innghat dawn a ni. Inthlannaah hian eng rilru pu in nge vote kan thlak ang le.
Kan chhungkaw pawisa min pe mai thei nge kan thlan dawna kan ram pumin hma a lo sawnna tur tih hi kan buk nghal tur a ni a. Kan mamawh dik tak hi mipui hian kan hai fo. Politician tawngkam thiam tak takin thu an rawn sawi a, a sawi tlawr thiam thiamah te hian kan tlu lut leh thin bawk. Hmasawnna tur hian mipuitling chin, ngaihtuahna fim nei chauhin kut kan thlak dawn a.
Tun dinhmunah kan ram hian engnge a mamawh ber tih hi inzawt ila a tam ber chuan mi ram anga hmasawn ve an duh thu an sawi ngeiin a rinawm. Hmasawnna hi amaha lokal ngawt a ni lova. Mipui rilruah hmasawn duhna in a siamchhuah a ngai a ni. Chu chuan sawrkar tha a siam chhuak thin. A pawimawh berah chuan mipui mamawh dik tak sawrkar tha chuan a siam thin.
Kan ramin a mamawh ber nia lang chu sawrkar tha, eirukna umbo thei tur sawrkar a ni kan ti lo thei lovang. Eirukna in kan ram a tihchhiat nasatzia chu kan hre vek a. Central atangin a ni emaw, state sawrkar thawhchhuah atangin emaw sum hi lo hmu mah ila sawrkar a that loh a, eiruknain bu a khuar miau chuan mipui chan tur a awm tak tak chuang lova. Kan retheihna ngaiah kum nga chu kan la tâng ngei dawn a. He eirukna umbo tur hian CM atan tunge kan awh ber, tunge dik lo chu hnawl ngam ang tih pawh kan thlir tel nghal a ngai bawk. Sawrkar chu party anga thlan tlin an ni thin ngei a. Mahse, a tawpah chuan CM thu thua kal a ni leh tho. Eirukna umbo tur hian kan politician te hi an hun kal tawh pawh kan en a ngai. Eirukna, hlemhletnaah an lo inrawlh tawh em, eirukna lakah an kut a fai em. Lo bawlhhlawh tawhte hi hnawl ngam an ngai. Eirukna a lo tal bal tawh hi chu pawn lam bal anga sil fai theih a ni lo a. Thinlung lama bal a ni a. Hmana bal tawh kha chuti ngawta sil fai ve theih a ni lo. A mihringa kha thlak tawp an ngai a ni mai. Sawrkar thaah chuan dik lo tawh kha an leng lova, dik lo an lal tir chuan sawrkar tha a awm thei hek lo. Chuvangin kan ram hmasawnna tur chuan hruaitu kut fai ngei kan thlan thiam a ngai a ni.