Aizawl : Lai Autonomous District Council (LADC)-a Lawngtlai Chandmary bialtu Dr Lorrain Lalpekliana Chinzah chuan LADC sorkar-a ZPM party a thlawpna nimin khan a theh lut.
Dr. Lorrain Lalpekliana Chinzah, Chandmary Bial atanga Independent-a MDC a thlan tlin chuan dan tlawhchhanin ZPM Party a thlawpna lehkha hi a theh lut a. LADC Chairman VL Hmuaka a awm loh avangin a aiawhin LADC Secretariat-a Secretary Lianchungnunga’n a dawng a ni.
Dr Lorrain chuan Mizoram tluchhe mek siam thatna hna thawk thei turin ZPM party policy chu tha a tih avang leh ZPM Leader Lalduhoma a rintawk thu leh, a kaihhruaina hnuaia Mizoram tlu chhe mek siam tha a, tung ding leh tura a beisei avanga ZPM a thlawp a nih thu a sawi a. Hei bakah hian sorkarna lo chelh tawh party te atangin Lai ramin Direct Funding a neih theihna tura hma an lakna chuan tun dinhmun a thlenpui thu leh ZPM party chuan Lai ram-in Direct Funding a hmuh theih nan a theihtawp chhuaha hma lakpui a tum avangin ZPM Party a thlawp thu a sawi bawk.
Kumin MLA inthlanpui lo awm tura Tuichhak bial ZPM candidate ni turin Dr Lorrain-a hi rin a ni a. Hetih lai hian, Alinery Lianhlawng pawh he biala ding tura sawm thawm a awm bawk.