Aizawl : Hachhek bialtu MLA Lalrindika Ralte chuan Kawrthah Zone Football Association Tournament kharna a hmanpuinaah infiammi hlawhtling ni tur chuan rilru hrisel neih a ngai a, rilru hrisel nei tur chuan taksa hriselna ngaih pawimawh hmasak a tul thu a sawi.
Lalrindika Ralte chuan ram pum huapa infiammi hlawhtling ni tur chuan taksa a hrisel a, a fit theihna tur chuan zuk leh hmuam leh ruihhloah an insum a ngai a. Ruihhlo a thalai infiam mi thenkhat an fihlim loh avanga an thlen tur ang thleng phak lo eng emaw zat an awm chu pawi a tih thu a sawi.
Mizo thalai zingah infiamna lama hlawhtling mi eng emaw zat an awm mek tih sawiin Hachhek bialtu MLA chuan, “Mizo mipuite hian kan chhuangin India pawhin chung mite chu a chhuang a. Chutianga infiamna a thleng sang tur erawh chuan insum theihna, thawhrimna leh huaisenna neih a ngai a. Chutiang neia hmalam pan tute chuan hlawhtlinna an chang thin,” tia sawiin, Mizo zingah pawh infiamna lamah sum tam tak la lut hi an awm chho ve ta zel chu lawmawm a tih thu a sawi bawk.
India ram mai ni lo, khawvel hriat tham a infiamna kawnga hlawhtling ni tura Mizo thalaite’n theihtawp chhuaha an beih a ngai tih a sawi a. “Infiamna hi infiamna a ni satliah ringawt tawh lo va, eizawnna tling vek a ni tawh a. Chutianga eizawng phak khawpa thiam bik leh tha bik ni tura infiamna hi eizawnna atana hmang thei turin rim taka thawh a tul a ni,” Lalrindika Ralte-in a ti.