Aizawl: MPCC President Lalsawta chuan kumin MLA inthlan lo awm tura Congress party manifesto pakhatna, ‘Tang Puihna’ huam chhungah zirlai zinga loan mamawhte tan sorkar a ding dawn tih a sawi.
NSUI Mizoram huaihawtin nimin khan 2022-2023 HSLC leh HSSLC Topper-te lawmpuina hun Vana Pa Hall-ah hman a ni a. He huna khuallian, Lalsawta chuan zirlaite tan bank atanga study loan lak a harsa tih sawiin, “Ngaihtuahna thar hmanga sutkian a nih chuan ding chhuak thei, kan ram rohlu (asset)-te hi vawiinah harsatna hrang hrangin tlakbuak rih che u mah se, in theihna hmang tangkai turin kan sorkar theih phawt chuan remruatna tha leh tluantling siam kan tum,” a ti.
Lalsawta chuan kumina MLA inthlanah Congress party manifesto No 1 ‘Tang Puihna’ huam chhungah zirlaiten zir zawm duh harsatna tawkte saltanna atanga an chhuah theih nan loan mamawhte tan theihtawpa hmalak theih a nih thu sawiin, “Hengte tan hian sorkar a ding dawn,” a ti.
Congress president hian Mizoramah ram dangin a neih ang leh an tih dan tam tak chu an nei ve vek a; mahse, tun hmaa an lo kalpui thin danah leh sorkar chakna hmanga zirlaite an enkawl danah te siam that ngai tam tak a awm a. Mipuiin sorkar sikul aia mi mal sikul an thlang tlatte thleng hian sorkar tan chuan siam that tur a tam tih a chiang a. Hei hi Congress party chuan ram mamawh a nih dan hriain siam that ngai tam tak zingah an ngaih pawimawh a nih thu a sawi.
Mizoramah tun hma zawng aiin thalaite hi khawvel ram dang thalaite nen tual khatah an cheng za ho ta leh zual a. Mi tam takin ram chhung maia thawk tura rilru an neih thin pawh hi India leh khawvel huap pawka thluak inelna kawngah an inbuatsaih a, an intahhruai a ngai tih sawiin, “Kan Mizo thalaite quality hi kan hre chiang a, tumna a awm chuan khawvel inelnaah hian a ti tha ber in ni thei tih hi kan hrechiang che u a ni. Khawvel hneh turin in rilru lo buatsaih rawh u,” Lalsawta’n a ti a ni.