India-a wrestler lawk tak takte chuan lungawi lohna an lantir mek zelah an medal lak tawhte chu an rama lui thianghlim ber, Ganges-a paihah an vau.
Ram khawpui ber, Delhi-a indonaa thite hriat rengna, India Gate- ah tiamchin awm lova chaw nghei an tum bawk.
Wrestler-te hian an pawl (federation) chief chuan kum tam tak chhung hmeichhe wrestler-te lakah mipat hmeichhiatna lam hawia mawi lo takin a che thin nia puhin a bân leh man an phut.
An puhna hi a pha thung.
“Heng medal-te hi kan nun leh thinlung a ni a. Kan nghawnga a awm reng hian awmzia a nei ta chuang lo niin kan ngai,” tiin Thawhlehnia thu an chhuahah an tar lang.
Olympic medallist pahnih, Sakshi Malik leh Bajrang Punia leh World Champion medallist vawi hnih ni tawh, Vinesh Phogat te chu thuchhuah intawm siamtu zingah an tel nghe nghe.
Wrestler-te hian an medal-te hi president leh prime minister hnena pek an tum phawt a; mahse, lungawi lohna an lantirah aw an la neih loh bakah anmahni ngaihvenna an lantir miah loh avangin pawi an ti tih an sawi.
“A hnuah chuan Ganges-ah paih kan ti a, kan tan awmzia a awm tawh chuang lo. India Gate-ah kalin kan thih thlenga chaw nghei kan tum a ni,” an ti.
Pathianni khan India parliament building thar pana kawng zawh tum man zingah Malik, Punia leh Phogat te hi an tel.
Police-ten lo dangin bus-in an phur sawn a. He thil thlenna hi Modi-a’n parliament building thar a hawn mek atanga hla lo te-ah a ni.
Video darhah chuan infiammite hi pawh beha bus nawr luh an ni a, video a darh hnuah infiammi dang leh eptu politician-ten an sawisel nasa hle.
Thawhlehnia thuchhuah an siamah wrestler-te hian an laka police chet dan chu mak an ti tak zet tih an sawi a, ‘mi sual’ ang maia an tih thu an tar lang.
“Hmeichhe infiammite hian an chunga mipat hmeichhiatna hawia che laka dikna hlen chhuah a nih theih nana an beihnaah dan an bawhchhia em ni?” tiin an zawt.
Delhi Police chuan wrestler-te lakah hian buaina an siam avangin thubuai an siam a. Delhi-a hmun hlun tak, Jantar Mantar-a lungawi lohna an lantirna hmun atang an um darh bawk.