Aizawl: MZP Sub-Hqrs, Lungsenin kumin HSLC pass tharte lawmpuina an buatsaih chu Thorang bialtu, Congress Legislature Party (CLP) Leader Zodintluanga Ralte-in a hmanpui a, zirlaite chu phone leh a kaihhnawih hmaa hun hmang tam loa lehkhabu chhiar tam an mamawh tih a sawi.
Lungsen North Branch YMA Hall-a inkhawmah Zodintluanga Ralte hian a bial chhung, Lungsen khuaa zirlai tithate a lawmpui thu a sawi a, tuna la hlawhtling ve lote tan hun tha a inher dawn a, tun hi an tawpna ni loin bul an tanna chauh a nih thu sawiin, “Zirnaah hian a pawimawh ber chu beidawn loh leh mi puitling nih theih a ni ber,” a ti.
Zodintluanga Ralte chuan Covid-19 avangin zirna kalpui dan nasa takin a danglam a, loh theih lohna avangin ‘online’ lam hawia kal nasat avangin phone, laptop leh a kaihhnawih lam an bih nasat a tul a. Mahse, tunah erawh naupang atanga upa lam thlengin phone leh a kaihhnawih khawih tam lo tura inkhuahkhirh a tul thu leh zirlaite chu lehkhabu chhiar tam turin a chah.
Thorang bialtu MLA chuan, “Zirlai kan nihin phone khawih loh tur tiin kan inzilh ngawt thei lo a, tih tur leh rilru dang lak penna tur kan dap a tul ber a. Lehkhabu chhiar bakah taksa sawizawina lam nasa takin kan uar thar a tul em em a ni,” a ti bawk.
MZP Sub-Headquarters; Lungsen Treasurer LH Lalramlawmi kaihhruai inkhawmah hian Lungsen BDO Obed Lalmalsawma leh MZP Sub-Headquarters, Lungsen President Lalpekhlua Punte bakah Gov’t High School, Lungsen Headmaster H. Rohmingliana te pawhin thu an sawi a. He hunah hian kum 2022-2023 chhunga Lungsen khua atanga HSLC pass mi 21-te hnenah chawimawina thilpek an hlan an ni bawk.