Premier League club Brentford chuan Netherlands goalkeeper Mark Flekken chu Bundesliga club SC Freiburg atangin an lalut.
Kum 29 mi manah hian Bees hian Pound maktaduai 11 vel an hmang nia ngaih a ni a. Work permit leh a insawnna a pawimawh turte tihfel a nih hnuah kum li contract an hnenah a ziak ang.
Netherlands tana vawi li khel tawh Flekken hian tun season-ah Bundesliga match 34 atangin clean sheet vawi 13 a nei a, Bundesliga-ah mahni goal venghim hnem ber a ni.
Brentford hian tun nipuiah an goalkeeper rinrawl David Raya chu an chan ngei dawn niin a lang a. Nakkum a contract hmang zo tur Spanish goalkeeper hian ngaihventu nei nualin a manah Pound maktaduai 40 vel an beisei niin an sawi.
A thlaktu tur lo ngaihven lawkin goalkeeper ke a ball khawih leh pass thiam Flekken chuan, “Kum sarih kalta khan German third division a ka khelh laiin Premier League-ah ka la inkhel dawn tih hi min hrilh ta ula ka awih lovang che u.”
“Goalkeeper ball pet thiam ka ni a, tlarhnung atanga chiai miah lova ball la chhuak thei ka ni. Hetiang hi ka team khelhnaah pawh ka ken tel thin a ni.” a ti.