China chuan nupa tuak khatin fa pahnih bak neih a khapsak dan chu hlipin fa thum neih a phalsak.
He dan tihdanglam hi communist party policy thlak danglamtuten meeting an neihnaah President Xi Jinping chuan a pawm a ni.
Kum 10 dana khua leh tui chhiarna an neihah China population-in hniam lam a pan tih hriatchhuah a nih vangin dan thar hi duan a ni ta a ni.
China census, tun thla tira tihchhuahah nikum khan nau piang maktaduai 12 an awm a, kum 2016-a nau piang maktaduai 18 awm nen chuan inthlau tak a ni a. Kum 1960 hnu lama kum khata nau piang an tlem ber tum a ni hial.
Family policy dan an hman mek chu census an tihchhuah rual hian mipuite chuan thlak danglam a nih an lo ring lawk sa tawh.
Kum 1979-a sorkar dan sawisel hlawh tak nupa tuak khatin fa pakhat chiah nei tura dan alo duan tawh chu kum 2016 khan hlipin fa pahnih neih phalna dan a siam.
Fa pahnih neih phalna dan an siam thar hnu hian kum hnih chhung chu fa neih kawngah han kâng veleh deuh mah se hniam lam a pan leh nghal thung.
Kum 1979-a duan nupa tuak khatin fa pakhat chiah neih theih dan an kalpui laia fa dang neih belhte chu a hremna atan pawisa chawitir leh hna atanga bântir hial an nih thin bakah nuin nau a pai lai chu tihluihnain tihtlaktir an ni bawk thin.