PHE changtu, Deputy Chief Minister Tawnluia’n nimin khan Hualtu daia Aizawl khawpui tui harsatna sukiang thenna tura ruahmanna kal mek, ‘Alternate Gravity Water Supply Scheme of Aizawl (AGWSSA)’ a tlawh.
Tuikhuahna hmunah hian a hna thawktu contractor-te nen inkawmin Tawnluia chuan tuna thlen chinah a thawktute hmalakna lawmawm a tih thu sawiin, Hualtu rama Tawi tlang bulthutah tuihna tha tak leh tuikhuahna tur hmun remchang tak a lo awm chu lawmawm a tih thu sawiin, “Tuihna humhalha tihchangtlun zel hi kan mawhphurhna lian ber zinga mi a nih avangin mi tinin hei hi tih tak zeta veia kan theihna zawn theuhah tan kan lak zel a ngai a ni,” a ti.
GWSSA hi Aizawl chhim lam chuan hnuai veng thenkhat – Mualpui leh Mission Vengthlang bakah Muallungthu tlangdung khaw hrang hrangte, Zoram Medical College (ZMC) huam telin mihring nuai hnih vel fur ruahtui chhawr tangkai theih hun chhung vel chawm thei tura duan a ni a. AGWSSA hi Ministry of DoNER-in NESIDS hnuaia thawh tura a ruahman niin Rs. nuai 11,730.35 senna tur a ni a, 100% central funding a ni.
GWSSA tuikhuah hian Tuikum leh Lunglei lui hnar bakah van ruahtui khawl a ring dawn a, tuikhuahin a chim chin hi hectare 4.1 a ni a, tui litre maktaduai 74 dawng tura ruahman a ni a. Tuikhuah thlen hma metre 900 velah hian tuikhuah atanga tui lak tihthianghlimna hmunpui, ‘Water Treatment Plant (WTP)’ siam a ni a. He WTP hi Rapid Sand Filtration Unit kaltlanga tui thlitfim tura ruahman a ni a. WTP-ah hian ni khatah tui litre maktaduai 15 thlitfim theih tura ngaih a ni.
Tun dinhmunah tuikhuah (earthen dam) sak hna 85% thawh zawh tawh a ni a, Water Treatment Plant sak hna 95%, pipe phum hna 75 % leh tuizem lian sak hna 98% thawh zawh a ni tawh bawk.