International Olympic Committee (IOC) chuan tun hnaia India-a lungawi lohna lantirtu wrestler lawk tak takte chunga chetna an dem thu an sawi.
Indian wrestling chief Brij Bhushan Sharan Singh-a’n hmeichhe wrestler-te lakah mipat hmeichhiatna hawia chet a thawh thin nia puhna chu chhui ngei an phut bawk.
Wrestler-te hi Pathianni khan parliament building thar pana kawng an zawh chu police-in an hreng.
An pawl (federation) chief chu a bân leh man an phut.
Singh-a hi MP hriat hlawh tak niin BJP a ni a, wrestler-ten an puhna chu phain ‘politics-a fuihtu’ an neih avangin hetiang hian an che mai niin an sawi.
Thawhlehni khan thuthar lakhawmtute hnenah Delhi police-in an chhui mek a, man a tulna khawp an hmuh chuan an man mai tur thu a sawi a. “Delhi police kutah a awm mek a ni,” a ti.
Olympic medallist pahnih, Sakshi Malik leh Bajrang Punia leh world champion medallist vawi hnih ni tawh, Vinesh Phogat te chu hren zingah telin Pathianni zan khan chhuah lehnghal an ni a. Police hian an lakah thubuai an ziak lut bawk.
Video leh thlalak darhah chuan infiammite hi man beha bus-ah nawr luh an ni a, infiammi dang leh eptu politician tam takin an sawisel.
Thawhlehni zan khan IOC chuan thuchhuah siamin ‘infiammite himna leh enkawlna tha ngaihtuah’ an duh thu leh chhuina chu ‘rang taka tih ni se an duh’ tih an tar lang.
United World Wrestling (UWW) nen pawh thil thleng hi an ngaihven reng tih an sawi bawk.
UWW pawh hian Thawhlehni khan thuchhuah siamin Wrestling Federation of India (WFI) president chet dan an sawite leh lungawi lohna lantirte chu an ngaihven reng tih an sawi.
“Chhuinaah result tha a awm lo chu a pawi hle,” an ti a. Wrestler-te nen pawh an inbiak thu leh dik taka an harsatna chu chin fel ni se an duh thu an tar lang.
UWW hian a hun taka WFI inthlan buatsaih theih a nih loh chuan an suspend hial tur thu an sawi bawk.