Aizawl: Larsap Dr Hari Babu Kambhampati chuan nimin khan Raj Bhavan-ah National Institute of Electronics & Information Technology (NIELIT), Aizawl hotute a kawm a, changtlung zawka NIELIT kalpui dan turte an sawiho.
He an inkawmnaah hian NIELIT, Aizawl Director-in-Charge T. Gunendra Singh chuan NIELIT-in Mizoram chhunga an hmalakna leh an thlen chin te, hmachhawp an neih leh an harsatnate larsap chu a hrilh a ni.
Larsap chuan NIELIT atanga diploma neiten Mizoram sorkar hnuaiah LDC hna an dil ve thei lo tih an sawi chu a ngaih thu tak thu leh hemi chungchang hi zirchiana sorkar thuneitute sawipui a tum thu NIELIT hotute chu a hrilh.
Central sorkar lama NIELIT mamawhte pawh a tul angin Ministry of Electronics & Information Technology, Government of India thuneitute hnenah bawhzuisak a inhuam thu a sawi a. NIELIT-in computer leh a kaihhnawih thil zirtirna hrang hrang a kalpuite chu a tha thawkhat nia a hriat thu leh theihtawp chhuah chhunzawm turin a chah bawk a ni.
He huna an tar lan danin NIELIT-ah hian kum khat chhungin zirlai 3,000 bawr vel chu course hrang hrang hnuaiah ziah luh thin an ni a. Hmeichhe hostel mi 51 awm theihna leh mipa hostel, mi 82 awm theihna an nei mek a. NIELIT hnuaia zirna hi chi thum – Formal, Non-Formal leh Short Term Course anga kalpui a ni.