Mizorama cham mek, Union State Minority Affairs Minister John Barla chuan Manipur raltlante chhawmdawlna turah state sorkarin mamawh a dil chuan sorkar laipuiin pek loh a nei lo ang tih a sawi.
Barla chuan nimin khan Aizawla BJP Mizoram Pradesh Office-ah chanchinbumite a kawm a, The Zozam Times-in Manipur atanga Mizorama raltlante chhawmdawlna tur sorkar laipuiin pek a tum em tih zawhna chu chhangin, Mizoram sorkarin raltlan chhawmdawlna tur sorkar laipuiah a dil a nih chuan ngaihtuah ngei ngei a ni dawn tih sawiin, “Pek loh kan nei lo ang, a tul ang zelin sorkar laipuiin hma a la dawn,” a ti.
Manipur-ah remna leh muanna a awm theihna turin hmalak mek a nih thu sawi zawmin, tunah hian Union Home Minister Amit Shah-a’n a thutchilh mek tih a sawi bawk a ni.
Minority Affairs Minister Barla chuan kum kua chhunga sorkar laipuia BJP sorkar hmalakna hrang hrang a sawi a, kum kaw chhunga India hmasawnna chu khawvelin a hmu chiang a, remna siam kawngah chak takin hma a la a, hmun kilkhawr zawkahte pawh hmasawnna ruhrel liante din a nih thu a sawi.
BJP-in sorkarna an chan hma, 2004-2014 inkar, kum 10 chhung khan India chu hmasawnna kawngah a pil bo a, “Kha kum 10 chhung khan he ram hian hruaitu chak lo tak a nei a, sorkar kha remote control-a thunun a ni,” a ti bawk a. Prime Minister Narendra Modi kaihhruai sorkar hnuaia hmasawnna hrang hrang point 50 chuang zet a sawi bawk a ni.