Apple Inc supplier Foxconn chuan April, 2024 atangin Karnataka-ah iPhone an siam tan dawn tih Ningani khan state sorkarin a puang.
Factory dinna tur ram hi July 1-ah Foxconn hnenah hlan a ni dawn tih sorkar chuan a puang a, project hlut zawng hi Rs. tluklehdingawn 130 zet niin hna 50,000 vel tal a siam belh tura ngaih a ni.
Khawvela electronics thil siam chhuaktu lian ber, Foxconn hian state khawpui, tech hub ni bawk, Bengaluru daia Devanahalli hmuna an plant atang hian kum khatah iPhone maktaduai 20 vel siam chhuah hman an tum.
Apple hian an siamna hmun ber, China-in COVID kaihhnawih inkhuahkhirhna khauh tak a kalpui avanga an iPhone leh thil dang an siam chhuah a muan phah avangin hmun danga insawn hi an tum a. Tech giant hian Beijing leh Washington inkara inmil lohna awm reng chuan a tibuai mai an hlauh bawk avangin siamna hmun hi sawn an duh bawk.
Karnataka sorkarin thu a chhuah chungchangah hian Foxconn chuan engmah a la sawi lo thung.