Aizawl: IPR Minister Lalruatkima’n Act East Policy avanga Mizoram chhim lam kawtchhuaha ram dangte lo dawngsawng tura inpeih a ngai tih a sawi.
Pachhunga University College-a Political Science Department-in PUC Seminar Hall-a ‘National Seminar on Navigating G20s Presidency: Strategizing India’s Leadership’ an buatsaih a hawng a. India ramin G20 President nihna a chelh chhungin kawng hrang hrangin hma a la a. Aizawl khawpuiah ngei G20 Forum chhungah Business 20 (B20) hlawhtling taka nghah niin, ram chhung hmun dangte leh ram dang atanga lo kal mi thiam rualte tawnhriat atangin thil tam tak ram mipuite an hriat loh tam tak an hriat belh tih a sawi a. Sumdawng lianten Mizoram chhunga an sum leh pai an peipun theihna tur kawng pawimawh tak nia a hriat thu a sawi.
Lalruatkima chuan Act East Policy avanga Mizoram chhim lam kawtchhuaha ram dangte nen insumdawn tawnna tur ruahmanna siam mek pawh nasa taka hma sawn zelin, a dawngsawngtu tur Mizoram mipuite inpeih a ngai tih a sawi.
Seminar-ah hian India-a France Embassy-a IT and Sustainable Cities Deputy Head Feli Visco chuan G20 nihphung a sawi a. Pachhunga University College Principal Prof. H.Lalthanzara pawhin thu a sawi a. Minister chuan PUC Directory a tlangzarh nghal bawk.