Aizawl : Kumin HSLC leh HSSLC exam-a pakhatna hnenah nimin khan Chief Minister’s Award hlan an ni.
School Education Department buatsaiha Chanmari YMA Hall, Aizawla Chief Minister’s Award semna inkhawmah chief minister Zoramthanga chuan HSLC leh HSSLC tithate hnena CM Award sem chu kumtin zirlai lehkhathiam tak tak ten an dawn thin avangin a hlutna a kiam ngai lo va, pek an nihna chhan chu a ropui em avangin an ngaihlu telh telh tih a sawi.
Chief Minister chuan zirthiamna finna, ropuina, remhriatna, taimakna, tumruhna leh hlawhtlinna a inzem nghet em em a, zirthiamna hian an suangtuah phak loh thleng hian kawng a lo hawn sak thin a, midangte tana malsawmna nihna kawng pawh a hawng zau bik thin tih a sawi.
Pathianin mihring te a siam hian chhia leh tha hriatna a pe tel a, chumi hmang chuan duhthlan theihna a ruahman sak a, he duhthlan theihna hi an hman thiam a pawimawh a, zirlaite pawhin hei hi fing taka an hman theihnan rilru fim an put a pawimawh a, hei hian damchhung nun a hril dawn niin a sawi bawk.
Khualzahawm School Education Minister Lalchhandama Ralte pawhin thu sawiin, zirlai hlawhtlinna changte leh an nu leh pate chungah a lawmpuina a hlan a. Mizoram sorkarin hun harsa leh khirh tak kum hnih chhung a hmachhawn chunga zirna tihhmasawnna tura kawng hrang hranga tan an laknain rah tha a chhuah mek a, sorkar sikulah pawh zirlai naupang an pung sawt hle tih a sawi a. “Tun hmaa sorkar sikulah chuan zirlai leh zirtirtu an inzat an tih thin kha tunah chuan a ni ta lo, zirtirtuten theihtawp chhuaha zirlaite hmakhua thlir chunga tan an lakna avangin hmuh theihin hma kan sawn a ni,” a ti.
Chief Minister hian HSLC topper leh HSSLC topper mi pathum te hnenah lawmpuina thu ziak (citation) leh tangkafai Rs. 50,000 theuh a hlan a ni.
Chief Minister’s Award dawngtute:
HSLC topper-
Cynthia Lalhlupuii Shangpliang, St. Paul’s HSS
HSSLC toppers-
(Arts)
Rodinpuia Ralte, Home Missions School
(Commerce)
Jonathan Lalhruaitluanga, St. Joseph’s HSS
(Science)
Vanlaldika, Aizawl, St. Paul’s HSS