Aizawl: Kumin Remna Ni lo thleng tur puala thla khat chhung thisen pek rûnpui neih tur chu nimin khan Chief Minister Zoramthanga’n a hawng a, “Kan chhehvel ramten Mizorama remna hi an it ngawih ngawih,” a ti.
Remna Ni puala thla khat chhung thisen pek rûnpui neih tur hawnna inkhawm hi Dawrpui Multipurpose Hall-ah a neih a, Zorama chuan Mizoram chu ram buai tak ni thin mah se tunah chuan mite it ngawih ngawih remna awmna hmun a nih tawh thu a sawi.
Ram dang miten Mizo an ngaihsan leh an hriat dan chu mahni hnam tana theihtawp chhuah ngam, mahni ram chhan nan leh hnam din chhuah nana nunna hlan ngam an nihna chu a nih thu sawiin, “Chu chu kan ropuina, kan hnam kan champion-puina pawh a ni reng a ni,” a ti.
Chief minister chuan remna hmachhuantute, nunna petute hre rengin, thisen pek hmangin anmahni chawimawina leh ngaihhlutna entir chu thil hlu tak a nih thu sawiin, thisen pek rûnpui neih chhung chuan a tam thei ang bera miin thisen an pek a beisei thu leh lawmawm a tih thu a sawi.
Thla khat chhung thisen pek rûnpui kalpui tur hi General Administration Department, Association for Voluntary Blood Donation (AVBD) leh Central YMA tangho buatsaih a ni a, hawnna inkhawm hi AVBD President C. Lalnunnema chuan a kaihruai a, CYMA President R. Lalngheta leh GAD Commissioner & Secretary K. Lalthawmmawia ten thu an sawi.
Programme chhimtu high school zirlai thenkhatin thisen an pe nghal a ni.