Aizawl: All Mizoram CSS Employees Co-ordination Committee chuan CSS hnuaia thawkte hamthatna tur ngaihtuah tura din study group-in ‘recommendation’ a siam chu June 15 hma ngeia tihhlawhtlinsak an phut.
Hemi chungchangah hian thuchhuah siamin, All Mizoram CSS Employees Co-ordination Committee chuan sorkarin a din study group-in ‘recommendation’ a lo siam tawh tun thlenga a hlawhtlinna hmu loa an la awm chu pawi an ti tak zet tih sawiin, June 15, hma ngeia tihhlawhtlinsak an nih loh chuan an kal zel dan tur chu an ngaihtuah dawn tih an sawi.
CSS hnuaia thawkte chu Mizoram sorkar hnuaiah kum tam tak chhung thawk tawh leh Mizoram hmun kilkhawr ber thlenga hmasawnna hna thawktu a ni tih sawiin, tun dinhmunah hian member 12,000 vel awmin, an tel loin sorkar department chu a kal thei tawh meuh lo tih an sawi.
Hetih mek lai hian an service-ah erawh hamthatna engmah dawng ngai lo an nih avangin sorkar hian a rang thei ang berin ‘Regularization Scheme’ leh study group-in a recommend hamthatna dang chu siamsak ngei an duh tih an sawi a ni.