Sakei 70 zet thattu nia rin, kum 20 zet zawn tawh chu Bangladesh-ah man a ni ta.
Habib Talukder hi Tiger Habib tih pawhin an sawi thin a, a awmna nia hriat kawhhmuhtu an awm hnuah man a ni a. A hmain manna tur thupek vawi thum lai chhuah a lo ni tawh bawk niin police-ten an sawi.
India leh Bangladesh inrina, Sundarbans mangrove forest-ah a chetla nasa hle a ni.
Helai hmun hi khawvela Bengal tiger tamna lai ber a ni a; mahse, thah a tam em avangin tunah chuan sang chuang awrh chauh an awm tawh.
Sakei thahte hi a vun, a ruh leh a sa an hralh thin a, khawvel hmun hrang hrangah man to tak takin an zuar thin.
Police chief Saidur Rahman chuan, “Hun rei tak a lo tlan bo tawh a ni,” tiin Dhaka Tribune chanchinbu hnenah a sawi.
Kum 50 mi, Habib Talukder hian Sundarbans ram ngawah hian khawizu laa hralhin a sumdawng thin a. Khawizu la ve thin dang, Abdus Salam chuan tual chhung mite hian an zah tluk zetin an hlau niin AFP news agency hnenah a sawi.
“Mi hlauhawm tak a ni a, ramhnuaiah hian amah chauh pawhin sakei hi a bei mai thin a ni,” a ti.
Officer Abdul Mannan chuan Dhaka Tribune hnenah kum tam tak chhung police leh forestry department-in man tumin an lo zawng tawh tih a sawi.
“Sundarbans-ah hian kum rei tak ata tawh luh phal loh a nih laiin a ruka lutin sa a pel thin a ni,” a ti a. “Pawi tam tak a khawih tawh a, a lakah hian thubuai tam tak ziah luh a ni a, a kaihhnawihah hian mi sual rual eng emaw zat an inrawlh bawk,” a ti bawk.
Dhaka Tribune hian Habib Talukder-a hi Inrinni tuk khan man niin a tar lang bawk.
Bangladesh-in kum 2018-a sakei chhiarpui a neihah chuan Sundarbans-ah hian sakei 114 awmin an pung hret.