Uttarakhand-a Pithoragarh district-ah lei minin kawng pawimawh tak a tihchim avangin khualzin 300 vel an tangkhang mek.
Lipulekh-Tawaghat kawngpui hi Dharchula atanga km 45 vela hla, Lakhanpur bula lei min avangin a chhia a, khualzinte hi Dharchula leh Gunji-ah an tang mek a. Lei min hian kawngpui metre 100 vel zet a hnawl liam tel a ni.
“Pithoragarh daiah, Lipulekh-Tawaghat motor kawngpui, Dharchula atanga km 45 vela hla, Lakhanpur bulah lei min vangin kawng metre 100 vela thui a min a. Dharchula leh Gunji-ah khualzin 300 vel an tangkhang mek,” tiin news agency ANI chuan district thuneitute thu sawi a tar lang.
Kawngpui hi ni hnih hnu velah erawh an tihtlang leh theih an beisei thung.
Weather department chuan Almora, Bageshwar, Chamoli, Champawat, Dehradun, Garhwal, Hardwar, Nainital, Pithoragarh, Rudraprayag, Tehri Garhwal, Udham Singh Nagar leh Uttarkashi district-ah te ruah leh rial a thawk dawn niin an sawi lawk.
Police chuan inralrinna tichhuakin biakzina chhuakte pawh hmun himah tawm hram hram turin an ngen.
“A theih hram chuan biakzinte chu hmun himah awm ula, tul bik thil a nih loh chuan chhuak lo ula, lirthei pawh hmun him leh lei min theih lohnaah hun tur a ni a. Khua a that hunah chauh zin tur a ni,” an ti.
“Yamunotri leh Gangotri Dham Yatra atana biakzinte chu khaw awm dan a ziaawm hunah chauh chhuak turin ngen an ni a, rain cover, nihliam leh thawmhnaw lum ken tel zel a tha bawk,” an ti.