Portguese full-back Diogo Dalot chuan Manchester United hnenah kum nga daih contract thar a ziak.
Kum 24 mi Dalot hian kum 2028 June thleng contract a ziak a, United in an player-te contract an ziahpui thin danin kum khat pawhsei theihna a awm.
Kum 2018 khan Dalot hian FC Porto atangin Old Trafford hi a pan a, an tan vawi 107 inkhel tawhin tun season-ah Erik ten Hag hnuaiah player tangkai zingah a tel.
United a zawm tirin first team tan khel tam lo mahse tun season-ah inelna hrang hrangah vawi 42 a inlan a. Portugal tan vawi 11 a inkhel tawh.
“Manchester United tana khelh hi football-ah chuan player tan chawimawina sang a tling.”
“Tun kum nga chhungin nasa takin hma ka sawn a, hun duhawm tak takte pawh kan hmang thin. He club tana ka inpekna leh thahnemngaihna hi nitin a zual zel.” tiin Dalot chuan a sawi.
Hmalam thlir chhunzawmin, “Tuna kan team a player awmte hian hlawhtling turin bul kan tan niin kan inngai a, kan zavaiin FA Cup final thlirlawkin theihtawp in kan inbuatsaih.” a ti bawk.
United hi tun nipuiah player hrang hrang nen sawizawm nimahsela Dalot-a’n contract thar a ziah avangin right-back thar an ngaihven dawn lo niin tam takin an ngai.