Union Home Minister Amit Shah chuan tun hnaia tharum thawhna thlenna, Manipur-a ralthuam kawlte chu thuneitute hnena an hlan lo a nih chuan na taka hremna pek an nih tur thu a sawi a. Tharum thawhna thleng chu chhui a nih tur thu leh peace committee din a nih tur thu a sawi bawk.
Shah hian sorkar laipui chuan Manipur inpumkhatna chungchanga a dinna chu a chiang tih sawiin tunah erawh thil pawi thei a awm avangin sawi vak a rem lo niin a sawi.
Chief Justice chawl tawh kaihhruaina hnuaiah Manipur-a buaina chhuak hi chhui a ni dawn tih Shah hian thuthar lakhawmtute hnenah a sawi a. Ni li chama hmarchhak state a tlawh mekah hian mi hrang hrang a kawm kual tawh a ni.
Peace committee pawh larsap kaihhruaina hnuaiah din a ni ang a, hetah hian security advisor Kuldeep Singh leh vantlang huap pawla mite member an ni ang.
Inphiarna awm nia hriat thubuai paruk chu Central Bureau of Investigation (CBI) chhui tura dah a ni a. “CBI-in sorkar laipui kaihhruaina hnuaiah a chhui ang a. Lai takin he chhuina hi kalpui a ni ang a, buaina chhuahna bul hi hai chhuah a ni ang,” a ti.
Home minister hian venhim hna thawktute hnen atanga ralthuam ru chhuaktute lakah pawh na taka chet an tum tih a sawi a. “Rawn dah let lo lakah na takin hma lak a ni ang,” a ti.
Manipur sorkar leh sorkar laipui chuan buaina chhuaka thi chhungte hnenah zangnadawmna Rs. nuai 10 an pe dawn tih Shah chuan a sawi a. “Zangnadawmna hi DBT (Direct Benefit Transfer)-a tih a ni ang,” a ti.
Chanchinbumiten state sorkar chu mipuiin an ringtawk lo nia lang chungchang an zawhna pawh home minister hian chhangin, sawihopui a tum thu a sawi.
Tar lan tawh thin angin May thla tira buaina a chhuah hnuah tharum thawhna hi a la reh meuh lo va, Pathianni pawh khan hel leh venhim hna thawktute an la inkap.
Buaina a chhuah atanga thla a liam dawnah pawh state sorkarin a la thunun theih loh hnuah Nilaini khan Kuki-Hmar-Zomi-Mizo tribal-te chuan chief minister bân phutna an lantir a, an state chu President’s Rule-a dah an ngiat bawk.
Hmarchhak state-a chi leh chi inkara tharum thawhna hi May 3-a tribal-ten Meitei hnamin Scheduled Tribe-a awm ve an dilna duh lohna an lantirna, ‘Tribal Solidarity March’ atanga intan a ni a. Hemi hma hian reserve forest huam chhunga Kuki awmte hnawh chhuah tumna a awm bawk a, lungawi lohna tenau lantir a lo ni tawh bawk.
Meitei hi Manipur-a cheng 53% chuang niin Imphal Valley leh a chhehvelah an cheng ber a. Tribal an tih, Naga leh Kuki te hi 40% vel niin tlangram district-ah an cheng ve thung.
Sorkarin a chhinchhuah dan chuan tharum thawhna thlengah khan mi 80 vel thiin chenna in tam tak hal a ni a, sakhaw hmunte pawh suasam leh beih a ni bawk.