MNF party chuan Aizawl North II bialtu MLA Dr Vanlalthlana chu a MLA fund hmanga ZPM party mite a duhsak duh avanga agency din chawpah an puh.
MNF Media & Publicity hruaitute chuan nimin khan Aizawl Press Club-ah thuthar thehdarhtute an kawm a, MNF General Secretary VL Krosshnehzova chuan Aizawl North II MLA huam chhungah local council pakua awmin, sorkarin MLA fund pek theiha a pawm NGO hrang hrang pawh an awm a, hetihlai hian MLA hian MLA fund hmang tur Aizawl North Development Society a din chawp tih a sawi.
VL Krosshnehzova chuan Aizawl North II MLA hian pawl a din chawp hmang chuan a biala hmasawnna hna zawng zawng deuhthaw party mite hna a thawhtir tih an sawi a, agency rintlak tam tak a awm laia party bil invulh theih nana agency din chawp a ni chu mak an tih thu an sawi.
Dan kalhin MLA fund chu ZPM Ramhlun South Unit III hnenah a pe tih an sawi bawk a, Dr Mathlana chet dan hian ZPM zia dik tak a pho lang nia a lan thu a sawi a ni.
MNF party hruaitute chuan ZPM kalphung thar MLA fund sem dan chu tlawmngai pawlte hnuaichhiahna leh dan kalha party mite uchhuak taka duhsakna a ni tih an sawi.
Mipui sorkar din tura insawi, sorkar chak leh huapzo din tum inti, kalphung thar zuara sorkar kal tawh zawng zawng chhe vek ang hiala puhtu ZPM party-te bumna thang lakah mipuite fimkhur turin an chah tih an sawi bawk a ni.