Mizoram aiawh a Muaythai inelna a fehchhuakten medal panga an hawn a. Chennai a neih zawh tak ational Muaythai Championship 2023-ah gold medal pakhat leh silver medal pali an la.
Mizoram tana gold medal awmchhun hi world bronze medalist Lalngaihawma, Hunthar lak a ni.
National Muaythai championship-ah hian Mizoram atangin player 5 an tel a, kal zawng zawngten medal an dawng vek.
Lalngaihawma hi 51 Kg Senior-ah pool A champion a nih hnuin pool B champion Manipur player nen champion nih an inchuh a, hnehna changin gold medal a dawng.
Rihna huang danga inelnaah George Lalmuanawma, Chawnpui chuan 60Kg Senior final-ah a khingpui Assam player lakah uiawm taka chak lovin silver medal a la.
Rony Lalchhuansanga, Kolasib College Veng chuan 54 kg Senior final-ah Rajasthan player hneh lovin silver medal a dawng bawk.
Lalrinhlua, Kolasib College Veng chuan 57 kg Senior final-ah Manipur player hneh lovin gold medal a hlawhchhuak zo lova,Lalruathlua, Luangmual pawhin 67kg Junior final-ah Kerala player hneh lovin silver medal a la ve bawk a ni.
National Muaythai championship-ah hian a pumpuiah Assam chu team champion an ni a, Kerala pahnihna niin Manipur chu pathumna an ni.
Muaythai Association President Brian Lalnunhlima chuan kuminah India ram pum huap inelna lianah an beisei anga an chetthat tawk loh thu a sawi a. Kum 2024-ah team lian tak tira India ram champion nih an tum tih a sawi.
Kumin July thlaa LPS Pro Muaythai awm leh turah, ram chhung leh state pawn atanga tel tur zawng zawng tan inbuatsaih a hun thu a sawi bawk.
Mizoram team hi Ningani khan Chennai chhuahsanin Mizoram panin an lo haw.