ZPM party chuan Manipur-a Zohnahthlak, tlang mite chu separate administration siamsak thuai turin central sorkar an ngen.
Nimin khan ZPM Political Affairs Committee (PAC) hruaitute an thukhawm a, Manipur buaina chhuak chungchanga central sorkar a che muang lutuk te, raltlante tana rehabilitation scheme a kalpui muang lutuk te chu demawm an tih thu an sawi.
ZPM chuan Meitei leh tlang mite hi engti kawng maha rorelna pakhat hnuaia awm zui chi an nih tawh loh avangin separate administration siamsak thuai turin central sorkar an ngen a. Manipur buaina avanga zirlai chhunzawm thei lo, zirlaiten zirna an chhunzawm theih dan tur a theih ang anga ruahmansak thuai turin Mizoram sorkar pawh an ngen bawk.
ZPM PAC thukhawm chuan Manipur-a Zohnahthlakte tanpuina turin party chhung bawm hun an rel a, sum leh pai mai bakah thawmhnaw thlenga thawhkhawm turin an party mite an ngen a ni.