Aizawl: ZPM Lai District Headquarters, Lawngtlai-in an vice president leh adviser pahnih ve ve bakah General Secretary i/c Lawngtlai Western Organisation pakhat show cause notice an pek zet hnuah nimin khan an sut leh nia hriat a ni.
May 30, 2023 khan ZPM Lai District Headquarters, Lawngtlai President MC Lalramchhana chuan vice president pahnih – PT Lalchuanglura (camp: Bualpui ‘Ng’) leh J Thangliana, adviser pahnih – Thangchemsanga leh JN Ngunkhuaia bakah A. Vanlalpuia, GS i/c Lawngtlai Western Organisation te chu show cause notice a pe.
Show cause notice pek an nih chhan tar lanah, ZPM Lai District Hqrs, Lawngtlai General Administration Department (GAD)-in April 28, 2023-a Lawngtlai East leh West-a MLA ticket chungchangah block leh unit hruaituten ZPM hqrs, Aizawl lama hruaitute hmu lo tura thuchhuah an siam ngai pawimawh lovin MLA ticket chungchangah Aizawla hruaitute hmuin an kal tih an hria a. Hetianga party thuchhuah leh inkaihhruaina zawm lova a ruka thil an tih chu party inkaihhruaina leh party chhungkaw tana thil tha lo tak a nih avangin June 2, 2023 ral hmaa tawngka emaw, ziakin emaw insawifiah turin hriattir an ni.
The Zozam Times thudawn danin, he show cause notice hi sut leh a ni.
Hetih lai hian, May 30, 2023 khan ZPM Lai District Hqrs, Lawngtlaiin tour programme a tihchhuahah, May 31 atanga June 2, 2023 chhungin J Thangliana leh PT Lalchuanglura te hi Lawngtlai East A/C huam chhunga ZPM Unit Block 1&2 area tlawh tura ruat an ni a. Zin tur zingah kumin MLA inthlanpuia Tuichhak bial ZPM candidate tura sawi kai, Dr Lorrain Lalpekliana Chinzah hming pawh ziah lan a ni.
Lai Autonomouse District Council (LADC)-a Lawngtlai Chandmary bial atanga independent-a MDC thlan tlin, Dr Lorrain Lalpekliana Chinzah hian May 30, 2023 khan dan tlawhchhanin ZPM party a thlawpna lehkha hi LADC Chairman VL Hmuaka hnenah a thehlut a ni.