Aizawl: Aizawl Municipal Corporation (AMC) Board of Councillors nimin thukhawm chuan AMC huam chhunga restaurant, hotel leh hostel te an thianghlim dan leh inenkawlna felfai dan endik an rel a, dengue dona turin fogging machine lei an rel bawk.
BoC thutkhawm chuan Aizawl khawpui chhunga restaurant, hotel leh hostel te chu AMC Licensing Regulation 2012 hnuaia register an nih angin he regulation dan hnuaiah hian an thianghlim dan leh inenkawlna felfai dante endik thin ni rawh se tiin a pawm.
Health department-in dengue leng lo pung zel tur dopui tura AMC a ngen angin hmalakna atan hian AMC huam chhunga veng hrang hrangten an hman theih turin fogging machine lei turin an pawm a, hei bakah hian lei laih khuahkhirhna dan, ‘AMC Site Development & Slope Modification Regulations, 2007’chu mipuite tana awlsam leh zangkhai zawka kalpui a nih theih nan hmalak an rem ti bawk.
AMC BoC thutkhawm hi Aizawl Mayor Lalrinenga Sailo-in a kaihruai a, AMC-a cash & accounts changtu executive corporator, Lalringliana’n AMC Budget 2023-24 sawifiahin a pharh a, budget hi Thawhtanniah sawiho leh tur a ni.