Wrestler-te lungawi lohna lantirin thawm a neih len mek lai leh an chet thawh zel dan tur an puan laiin 1983 World Cup-a champion cricket team member-te chuan uchuak taka hma la lo turin an ngen ve mek bawk.
Infiam mite hian India tana medal an lak tawhte chu an thil phut tihhlawhtlin a nih loh chuan lui thianghlim, Ganga-a paih an tum tih an sawi a, hemi chungchangah hian Kapil Dev-a hovin cricket hranghluite hi an tawng chhuak.
Wrestler larte hi Nilaini khan Haridwar-ah kalin an medal dawnte chu luiah hian paih an tum a; mahse, lo neitu hruaituten an ngen avangin an paih lo.
“Kan champion wrestler-te tih an nih dan hi hmuh hrehawm kan ti a, rim taka thawka an hlawh chhuah medal hial Ganga-a paih luh tumna rilru hial an pu tura an thil tawn ti a pawi kan ti hle,” tiin 1983 World Cup champion team chuan thu an chhuah a. “Heng medal-te hi kum tam tak beihna, inpekna, tumruhna, beih hram hramna nena an neih a ni a, anmahni ta pawh a ni bik lo va, ram tana chhuanawm leh hlimna a ni,” an ti.
“He mi chungchangah hian thutlukna mawlmang tak siam lo turin kan ngen a, chutih rual chuan an duhte pawh ngaihthlaksakin chin fel thuai ni se kan duh a. Dan angin thil tih ni rawh se,” tiin skipper lar, Kapil Dev leh India mipui atchilh ni thin, Sunil Gavaskar leh Mohinder Amarnath te leh an khelhpuite chuan an thuchhuahah an tar lang.