French Open mipa inelna lama seeded number four nihna changtu Casper Ruud chuan third round a lut a. Giulio Zeppieri lakah set li inkhelah hnehna a chang.
Nikum final a tlawm Norwegian mi kum 24 a upa Ruud hian an inkhel tantir lam thunun in 6-3 6-2 4-6 7-5 in hnehna a chang a. Set hnihnaah Zeppieri hian beilet huaisen viau mahse a dang tluan thei lo.
Nikum khan Ruud hi French Open bakah US Open final-ah a tlawm a. Kuminah hian a Grand Slam title hmasa ber lak tumin a bei mek. Round dawtlehah hian Zhang Zhizhen a hmachhawn leh ang.
Inkhel dangah German mi seeded number 22 Alexander Zverev chuan awlsam angreng takin court Philippe Chatrier a inkhelah Alex Molcan chu a hneh.
Nikumah inhliam avanga semi-final khel zo thei lo Zverev hi darkar khat leh minute 58 chhung inkhelah 6-4 6-2 6-1 in a chak a. Aslan Karatsev 3-6 6-3 7-5 6-2 a hnehtu seeded number 12 Frances Tiafoe a hmachhawn leh ang.
Tlawm langsar zingah seeded number 8 Jannik Sinner a tel a. Set nga inkhel hautak tak maiah Daniel Altmaier chu 6-7 (0-7) 7-6 (9-7) 1-6 7-6 (7-4) 7-5 in darkar nga leh minute 26 chhungin a hneh lo.