Aizawl : Mamit-a FCS&CA office building thar chu nimin khan FCS&CA Minister K Lalrinliana’n a hawng.
FCS&CA Minister chuan NABARD hnuaia administrative buliding sakna tur sum hmuh theih a ni lo chungin Supply Godown satu contractor ten an Godown sakna atanga hlawkna an hmuh pawhkhawm atangin Mamit DCSO Office building thar chu puitlin theih a nih thu sawiin, lawmawm a tih thu a sawi a. He hna puitlin theihna tura thathawhtu leh khawtlang mipui tawiawmna zawng zawngah lawmthu a sawi.
Supply Minister chuan thenawm state ten kawngpui leh rel kawng block thin mahse, “Pathian remruatnain kan kal zel ang a, kan ram, kan hnam hi huaisen takin Pathian thlazarna hnuaiah hmalam panin kan kal zel dawn” a ti a. “Taima leh inlungrual takin, kan unau raltlante nen kan awm ho chuan hnam ropui takah kan awm thei tih hria a, inngeih tlang taka chenho a pawimawh” a ti bawk.
Sorkar thuchhuahin a tarlan danin Mamit-a FCS&CA building sak hna hi Babie construction & consultancy-in thawkin, estimate amount Rs. nuai 100 a ni a. March 2022 atanga sak tan niin, a building len zawng 60 × 40 feet a ni.
Nimin vek khan Fisheries Minister ni bawk K. Lalrinliana chuan Zawlnuam-a Fisheries department Brood Bank sakna hmun tur pawh a tlawh a. Brood Bank sakna hmun tur hi J&L Associates Tlangnuam, Aizawl leh Fisheries department tangkawpin Jt. Inspection an tih hnuah a sak hna bultan mai theih tura ruahman a ni.
Nghapui khawina leh Sangha chi khawina hmunpui hi puitlin a nih hunah chuan khawtlang mipui ten Sangha chi khawi tur an intodelh dawn bakah Sangha an mamawh ang ei tur a phuhruk ngei beisei a ni.