Mizoramah inthlanna thianghlim leh felfai zawk kan neih theih nan tiin hun rei tak atang tawh khan Mizoram Peoples Forum din a ni a. MPF hi kohhran hrang hrangte duh dan leh political party te pawhin an thu zawm tura duan a ni. Sum leh pai senso te a lo tlem a, candidate te pawhin sum sen lama an intlansiak loh nana viltu tur pawl pawimawh an ni deuh ber a. Chutih rualin politics a inbeihna bawlhhlawh tawngkam chhe deuh deuh hmante pawh MPF telnaah chuan thil tih remchang vak lo a nih hmel deuh bawk. Sum leh pai inpeka vote lei bakah pawh ruai theh mup mupte an khap a. Candidate te pawh an insen a tlem phah viau niin a lang thin.
Tun thleng hian kan thenawm state te lakah chuan sum chu an seng tlem deuh ni chuan a lang mai thei a. Mahse, chhungril lam a lang thei lo lama sum sen erawh rapthlak khawpa tam an seng theuh thin tih chu kan hre vek thung.
Titi tam takah chuan candidate ni tur chuan sum sen inhuam chin hi nuai 100 atanga nuai 200 te chu an inhuam a ngai thung a. Kan MLA ni mek zingah nuai 200 senga thlan tlin te, a then chu nuai 300 sengte an ni nual niin a lang. Nuai 100 hnuai lam hi chu a seng tlem lam an ni vek tawh mai. Kan assembly inthlan chu crorepati te intlansiakna a lo ni ta.
A langa paua sum inpe lova pawisa inpek theihna remchang Gpay te tunlaiah a lo lar chho leh ta zel a. A hmaa a ruk thei ang bera pawisa fai inpe thinte tan kawng a rawn inhawng zau zual zel bawk nen, MPF tan pawh ven hleih theih loh hmanrua an rawn inchhawp chhuak thar zel a ni ber a. Phone hmanga vote inlei a hluar dawn hle tih chu tunah chuan hriat sa a ni tawh a. Gpay hian kan nun a ti awlsamin a khawih danglam nasa em em a. Zep thu a cheng lo, zu leh zan lam KS thlengin gpay hi an lo hmang ta! Hetiang karah hian politics a vote lei nana a remchan turzia pawh a lang lawk vek a ni.
Pawisa inpe a suma vote lei a lo awlsam tak zel bawk si avangin MPF pawh hian a kalhmang hi a in en uluk lehzual a ngai ta niin a lang a. Kohhrante kaihhruaina hnuaia din MPF hian awmzia a nei lo thui zel dawn. A bik takin MPF din ngai lohna lamah kohhran ten tan an lak zual a ngai. A tangkafaia pawisa inpekna hi a petu tur leh a pek tura ten politic khawvelah hian thinlunga tha an tih lohna hi a tuh a tuh a ngai tawh zawk. A langa paua campaign-na a invilte hian awmzia a nei lova. House to house kan khapte pawh hi ennawn ngai a ni tawh khawp mai. Engkimah hian ennawn ngai reng khawvelah kan cheng tih hriain hma han la teh se.