Sorkar enkawl zirna ina zirlaite chu zirlaibu a thlawna pek tur an ni a, hetihlai hian zirlai naupangten an la dawng kim lo hle.
Hemi chungchangah hian sorkar enkawl zirna in hrang hranga thawkte biakpawh an ni a, Samagra Shiksha hnuaia thawktu thenkhat chuan zirlai naupangte tana free textbook sem tur chin subject hi thlan chhuah sa a ni a, class tinah zirlaibu sem tur bik subject hi a inang lo vek a; a thleng hmasa apiang school hrang hrangah zirlaite daih ang tawka sem zel a nih thu sawiin, tun dinhmunah hian eng subject bikte nge an la dawn kim loh tih sawi mai a harsa an ti a. Zirlaibu rawn thlengte hian zirlai naupang zawng zawng a daih nghal vek lo a, hetiang harsatna hi kum tin an tawk tih an sawi.
Hei bakah hian Samagra hnuaia thawktute chuan zirlaibu sem turte hi kum kalta UDISE report (enrollment) ang mila siamtir thin a nih thu an sawi a, chutihrual chuan lehkhabute hi hmun khatah chhuttir an ni lo va, a chhutna lama harsatna awm leh a phurh kualna kawng avanga harsatna awm avangten sem tlai a ni thin tih an sawi bawk.
Hetihlai hian April 16, 2023-a Sub-Hqrs. YMA Kolasib rorel inkhawm chuan Samagra Shiksha hnuaia a thlawna zirlaibu sem (free textbook) kalpui thin chu sikul luh ruala zirlai naupangte hnena an indaih ngei pek a nih theih nan Central YMA-in hma la rawh se tih an rel angin Central YMA hnenah hmala tura thlen a ni tawh a; Thomas D Lalengliana, President Sub-Hqrs. YMA chuan CYMA lam hmalak chin erawh an hriatpui tawh loh thu a sawi.
Mizo Zirlai Pawl (MZP) pawhin hemi chungchangah hian hma la tawhin zirlaite April chhung ngeia zirlaibu leh uniform pek an lo phut tawh a, MZP thil phut chu a la hlawhtling lo niin a lang thung.
Zirlaiten a thlawna zirlaibu an dawn tur an dawn kim loh chungchangah hian Congress thalai (MPYCC) hruaitute chuan nimin education minister hnenah lehkha thehlutin, hemi chungchangah hian a rang lama hma la turin an ngen a, primary school-ten zirlaibu an la dawng kim lo tih leh a dawn tlem a zawngte pawhin subject hnih khat bak an la dawng lo tih an tar lang.
Samagra hnuaia a thlawna zirlaibu sem hi sorkar sikula kal zirlai naupangten an dawng dawn a, hetihlai hian tun thlengin zirlaibu dawng kim hi an la awm lo niin hriat a ni a; July 17 atang khian first term exam buatsaih tur a ni tih sorkarin school calendar a tihchhuahah chuan tar lan a ni.