ZPM thalaiin MNF General Secretary, media & publicity department changtu VL Krosshnehzova chu thu dik hai dera thu belhchiandawllo sawiah an puh.
Tunkar Ningani khan thuthar thehdarhtute kawmin MNF General Secretary VL Krosshnehzova chuan Aizawl North II bialtu MLA Dr. Vanlalthlana chu MLA fund hmang dik tawk lo ah a puh a. Hei hi thubelhchiandawllo a nih thu ZPM thalai chuan sawiin, VL Krosshnehzova chu MNF ticket-a Ṭawi biala din a beisei avânga a thiam ang anga lar khel vea an ngaih thu an sawi.
ZPM thalai chuan Dr. Vanlalthlana’n a bialah implementing agency atan dan hnuaia society register thlap, Aizawl North Development Society (ANDS) chu ni 23.2.2022-ah inremna ziahpuiin, mipui hriat theih turin TV leh chanchinbu lamah pawh pekchhuah a nih thu an sawi a. Hemi kawnga a hmalaknaah MLA fund hman dan tura kaihhruaina kalh a awm lo niin an sawi.
“Dr. Vanlalthlana hian vengtina Local development committee whatsapp group-ah an veng chhunga sanction a siamna lehkha a tarlang nghal zel a. MLA fund a hman dan a puangzar zel ang hian MNF MLA-te hian an puangzâr ngam ve em? tih hi kan zawhna a ni” ZPM thalai chuan an ti a. Dr. Vanlalthlana aia NGO leh Sporting club hnena MLA fund pe hnem MNF MLA zingah an awm an rin loh thu sawiin, “NGO leh Sporting club hruaitute leh member ten ngaihsaktu an neih avanga an lawm viau laia, bialtu MLA-in anmahni a hnuaichhiah anga Pu VL Krosshnehzova’n a tarlang ta mai hi NGO leh Sporting club-te hmusitnaah kan ngai a ni” an ti.
ZPM thalai chuan “Pu VL Krosshnehzova’n Ramhlun South YMA Y-Section hna chungchanga Dr. Vanlalthlana a beihna pawh hi hre reng chunga mimal inbeihnaah kan ngai” an ti a. “Kha thilah khan file a kal thui hmain Dr. Vanlalthlana hian a cancel vek a ni” an ti bawk a ni.