May 15 khan Muthyala Gaddayya chuan a nupui, Muthyala Gadayya-i ruang, Covid-19 avanga Vijayawada, Andhra Pradesh-a damdawi ina thawkten an tuam phui tlat chu a phum a. Thla chanve zet hnu, June 1-a amah hriat rengna hun pawh an hman vek hnuah a nupui, kum 70 mi hi dam takin a lo haw leh tlat!
He thil hi Krishna district-a Jaggaiyapet khuaa thleng a ni.
Pitar hi Government General Hospital, Vijayawada-ah hri a kai avangin May 12 khan dah luh a ni a. A pasal hian a tlawh fo va, May 15-a a tlawh leh chuan a lo awm ta lo va, nurse-te a zawh chuan a thi tih lo an lo hrilh ta a ni.
Ruang dahna enkawltuten a ruang hi tuam vekin an pe a. An khuaah hawpuiin an vui nghal bawk.
May 23 khan an fapa, kum 35 mi, Muthyala Ramesh chu Khammam district hospital-ah Covid-19 avangin a thi leh bawk.
Girijamma-i leh an fapa, Ramesh hi June 1 khan hriat rengna hun chhungkuain an hmang a; mahse, a tukah nu ber hi a lo haw leh ta mai si a ni.
Girijamma-i hian a dam hnua a chhungte tumahin an lam lo chu mak a ti hle a. Damdawi inin Rs. 3,000 an pek hmanga amaha a haw thu a sawi.
A chhungte leh an thenawmte chuan a pasalin ruang a hawn kha tuam vek a ni a, hri inkai darh an hlauh avangin tu nge a nih hre turin an hawng lo hrim hrim niin an sawi.
Jaggaiyapet Sub-Inspector KV Rama Rao chuan Vijayawada damdawi in thil tih dik loh awmah hian thubuai an ziak lut lo tih a sawi.