- Laiu Fachhai
Kumina Union Public Service Commission (UPSC) exam result chhuakah, kan state (Mizoram) atangin pakhat mah kan tel lo va, pawi an ti hlawm hle a, zahthlak hlea ngaite pawh an awm. Kan education system leh kan taimakna thlenga sawiselte pawh an awm bawk.
He ziaktu erawh hi chuan, pawi ka ti lo va, ka zak bawk lo. Mizoram State-in kan hloh a awmin ka hre lo. Indian Administrative Service (IAS), Indian Police Service (IPS), Indian Forest Service, etc te hi mipui hna min thawhsak tur leh rawng min bawl sak tur (public servant) te an ni a, chuvangin tlingte zingah kan state atangin an tel lo a ni chuan, state dang atangin mi an lo kal ang a, hna min lo thawhsak ang a, rawng min lo bawlsak mai ang chu, an chunga thuneitu politician te kan nei tho alawm tih ngaidan ka neih a, rilru hahdam takin ka awm a, ka zing thingpui in thin pawh ka thlulh hran lo.
Colonial hun lai khan, anmahni, United Kingdom (UK) rama Crown Civil Service an tih kalhmang zulzuiin, India ram tan Indian Civil Service (ICS) an siam a. Colonial hun laia ICS-te kha British mite vek an ni thin. Colonial hun lai a ni bawk a, chuvangin India mite chunga intihmilen dan pawh an thiam hle. An milian hle reng bawk. Colonial hun tawp lamah India mi tlemte ICS-ah an dah a. India miin ICS a han ni chu, Sap ICS-te intimilian thiam ai pawhin an intimilian zawkzia sawi te a awm thin. A dik ang. Indiaah chuan tun thlengin VIP, VVIP hnamzia kan la vawng nung hi maw. VIP Ration Card te pawh a awm kha maw!
India-in zalenna a hmu hnuah erawh chuan, ICS tih thin kha IAS tia thlak a ni a, service dang tamtak siam belh a ni. Khawvel ram tamtakah erawh chuan, central leh state service hna nghet (security of tenure) system siam chu tul lova milian (bureaucrat) tihpunnaah an ngai a, an siam tawh hlawm lo. UK ngeiah pawh Crown Civil Service member chu tlemte chauh an awm tawh a, civil department bik chauh an enkawl tawh a ni awm e. Line departmenttea thawk tur chuan, an line-a thiamna nei mithiamte an la zel tawh. Indiaah erawh chuan, central service leh state service te hi engkim thiama ngaih an ni chek a ni ang chu, civil departmentah chauh lo pawh, line departmentah te thlengin thawhtir an ni. Hei hi kal dan tha ber leh tul berin a lang hran lo.
Central service leh state service officer hna nghet (security of tenure) kalphung hi a awm lo a ni pawhin kan kal thei tho ang. Entirnan, Public Works Department (PWD) ah hian Director hna chauh ni lovin, Secretary hna thawk tur pawhin, engineer senior-te aiin IAS, MCS leh Central Service Cadre dang ten an hriat zawkna tur thu leh an thiam zawkna tur thu a awm lo.
A nihna takah chuan, PWD Secretary hna thawk tur chuan, Bachelor of Engineering (BE) kum 4 zir zawh hnuah, internship kum khat tia, chumi hnuah engineer leh PWD admin hna kum 30 thawk tawh chuan, Bachelor of Arts (History Honors) atanga IAS tlinga, thla engzat emaw training neih a, kum engzat emaw service neitu ai chuan, engineering hna leh admin kalpui dan tur a hre zawk em em ang. Chutiang bawkin, Health Secretary hna thawk turin, Bachelor of Medicine, Bachelor of Surgery (MBBS) kum 5 zir zawh hnua, internship kum khat tia, Doctor leh Hospital enkawl hna kum 30 thawk tawh chuan, Bachelor of Arts (BA general) a zawh hnua Mizoram Civil Service (MCS) tling a, thla engzat emaw training neih a, service kum engzat emaw neitu ai chuan, Health Department kalphung leh kalpui dan tur a hre zawk ngei ang.
Chuvangin State thuneihnaa tih theih a nih chuan, director chauh lo, secretariate-a secretary hna thawk tur pawhin, anmahni line theuha mithiam leh senior-te atanga thawhtir zel ni sela, hmasawnna a awm thei zawk phian mai thei. Danin a phal chuan, Deputy Commissioner (DC) hna pawh hi IAS leh MCS ni loten an thawh theih lohna tur chhan a awm lo. Prime Minister, Chief Minister, Chief Executive Member hnate an thawh thiam chuan, DC vel hna te hi chu an thiam lohna tur a awm lo.
Central service-a tling kan awm lo avangin sun reng tawh suh ang u khai. Sawrkar hna a ni mai a, ram hmasawnahte chuan sawrkar hna hi chu mi tam zawkin an thlan duh ber hna a ni hran lo. Mipui tam zawk chuan mahni private business – company, factory, industry, etc te din an duh zawk daih. Chutianga private business din thei dinhmuna ding lote pawhin an zirna leh an thiamna hmangin private company, etc tea thawh an duh fe zawk a ni.
Chuvangin state sawrkar meuhin thalaite central service tlin theihna tur ngaihtuah a, coaching te buaipui a, scholarship te pek hi tih tawh loh a tha. Central servicea luh duhte chu anmahniin zir sela, coaching te kal sela, an in-exam ve mai tur a ni. Kan thailaite lehkha thiam thei an tam tawh. Tling an awm chho zel mai ang.
Kohhrana “Central service kan tlin theih nan” tia tawngtai thupui thawh thin te pawh hi, chunglamin engtin nge a ngai ang tih te ngaituah chian a tha hle. Central service tlin theihna tura tawngtai ai chuan, kan thalaite Pathian hriatna leh tihna nei a, dikna, rinawmna, thianghlimna, hmangaihna, finna leh taimakna nun an nei theina tura tawngtai nasat zawk ila, chunglam a tilawm zawk phian a rinawm.
Central service-a kan thalaite an luh thin chu a tha. Lut an awm lo a ni pawhin khawvel tawpna a ni hran lo. Kan hloh a awm lo va, kan zahna tur chhan a awm bawk lo. An tlin chuan lawmpui ila, an tlin lo pawhin i pawm zam mai ang u. India mipui nuai 140,000,000,000 (1,400 million) te compete tur chuan, Mizoram mipui nuai 11 lekte tan chuan a hau hle bawk a ni. Chutichung pawh chuan kan thalai lehkhathiamte an tlin chho zel mai ang.
Central service leh state service te aia pawimawh zawk a ni lo pawhin, a tluka pawimawh leh tangkai chu, mahni line theuha mithiam, professional thalai tamtak an chhuah hi a ni. Chutiang chuan state, national leh international private company, etc tea thawktu kan tam ang a, chhungkua, khawtlang, ram leh Kohhran tan malsawmna thlenpuitu an ni ang. Delhi leh state dangtea Mizoram State atanga central service cadrete an awm chu kan state mite tan an tangkai thin ngei mai. Chutihlaiin, an awm lo a ni pawhin, kan tih turte chu kan ti thei tho ang.
Central service hi kan pathian be palh ang tih a hlauawm hle. Cenrtral service hi hna tha ber leh hna rôpui leh sang berah ngai tur pawh a ni bik lo. Sawrkar hna (public servant) pakhat a ni ve mai. Central service lo pawh hna tha leh ropui tamtak a awm tih hriain, kan thalaite fuihphur i la, India state dang leh foreign hospital, university, bar council, hotel, airline, tourism, information system leh company dangtea professional thawktu tha tamtak nei zel turin hma i la ang u. Chutiang professional hna leh hna dang thawk duh loh leh thawk thei lohten central leh state serviceah te luh tum sela, an tlin chuan a tha hle bawk. An tlin loh pawhin a pawi lo. Beidawng tur a ni lo.
Hna zawng zawng hi a tulna leh a hlutna a inangtlang a. Hna tha zawk leh chhe zawk emaw, hna lian zawk leh te zawk emaw a awm hran lo. An pawimawh vek a, a pawimawh ber chu, eng hna pawh ni se, Pathian hrereng a, Amah tihna nen dikna, rinawmna, thianghlimna leh hmangaihna nunte nei chunga, taima tak leh fin taka thawk a, kan mawhphurnate hlen theuh hi a ni. Chutianga thawktute chu ramina a mamawh thawktute an ni.