- Lallunghnema, Charity Lodge
Consumer Huang thahnem ngai taka lo chhiartute in za vaiin chibai ka buk a che u.
Inthlahrung lovin in thil leinaa harsatna in tawh chuan min pun zel dawn nia. Mite tanpui hi ka dam chhan a ni a. Chuvangin ka dam phawt chuan lawm takin ka lo buaipui zel ang che u.
May ni 30 kha Consumer Solidarity Day a ni a. Thupui chu ‘Things to do’, tih a ni. Thil lei na leh hmanna a consumerte ,’tih tur’, tih a ni thei ang chu.
Thil leitu chuan a thil lei tur chu a bel chiang hmasa tur a ni.
Thil leitu chuan hmanhmawh takin thutlukna a siam mai tur a ni lo.
Thil leitu chuan cash memo emaw reciept emaw a la tur a ni..
Consumerte hi kan inlungrualin kan inpumkhat tur a ni. Gas lak chungchangahte,Ration laknaahte,electric hman chungchangahte,tui chungchangahte leh kan thil lei leh hmanna kawng hrang hrangah te hian kan thawhho that hle a ngai a ni. Mi tam takin consumer justice hi an ngaihsak duh lova. An mamawh em em si a ni!
Service tha lo hi Consumer Protection Act bawhchhiatna a ni a. Service pe tha lotu chu hrem theih a ni. Chutianga thil tisualtu chu Consumer Court chuan a hrem thin reng a,pawisa tam tak tak an chawi fo thin a ni. Chuvangin mitin kan fimkhur a ngai hle a ni. Thil zuartu leh thil hralhtute pawh duham leh mahni hmasial lutuk hi malsawmna a ni ber lo tih hre thar leh turin ka chah duh a ni.
Consumer Court leh Commission hi kan sawi pawlh fo thin a,hming hi thu hmun lo mahse,an kawh a thu hmun ve ve a ni. Consumer term-ah chuan Court tih hi a rem lo va. Sawi leh ziak thenkhatah hian Court kan ti sam mai thin a. Official chuan Court tih hi a remchang lova, Commission tih hi Act sawi dan dik tak chu a ni.
Consumer Protection Act 1986-ah khan consumer-te thubuai chinfelna hi District-ah chuan Forum tih a ni thin a. Mahse,CPA 1986 phum bo a nih a The Consumer Protection Act 2019 siam thar a lo nih khan , Consumer Protection Act 2019 chuan District Forum chu District Commission tiin a lo thlak ta a ni.
Tichuan, Forum tih hming chu phum bo a niin Commission tih chu hman a ni ta a. Commission tih hi Official a ni tih hriat tur a ni.
Kan Thupui hi thlawhtheihna tum hmun (airport) thuneitute hrem thu a ni a. Consumer Protection Act 2019 Sec II(2)-ah chuan Deficiency in Service chungchang sawi a ni a. Hna tha lo leh belhchian dawl lo, hna thawhsak avanga thil a nih ang ni zo lo chu, a titu hrem theih a ni.
Service Provider-te zingah hna tha lo, a hmangtute chhiatna leh tuarna thlen thei an nih chuan hna thawktu chu a phu tawkin hremna a chungah lek kawh theih a ni. He Airport pawh hi a ni ve . Consumer Commission-te chuan awm leh phu an tih angin hremna an che lek ta a ni ber .
He thil thleng hi media lar tak pakhatah tih chhuah a ni a. Saptawng ka han rawlh leh lawk ang e,
“Consumer Court orders Airport to pay RS 16000/- to a passenger who caugt fever after he was drenched by rain while boarding flight.
“A Kerala Consumer Court recently orders the Cochin International Airport Ltd to pay compensation of Rs. 16000/- to a passenger who got drenched in the rain because the step ladder to board the flight did not have any cover to protect the passenger from the rain”.
(TGN Kumar V The Managing Director (CIAC) — District Consumer Disputes Redressal Commission, Ernakulam
Cochin-a International Airport step ladder-in chung khuh a neih loh avangin passenger-ten ruah an do phah a. Heta passenger zingah TGN Kumar a pawh a tel a ni. TGN Kumar chu ruah chuan a nan huh vek a. A khua a sik phah hial a ni. Heti tak maia a khuate a sik hian a tih tur tam tak a tih loh phah hial a. Airport thuneitute hnenah a complaint a. Mahse, an lo ngaihsak tha duh lova, chuvangin a lungawilohna chu District Consumer Commission hnenah a thlen a. Hetiang hian District Consumer Commission, Enakulam chuan he Airport hremna turin thutlukna(Judgement & Order) hi a tichhuak ta a ni.
He Cochin Airport hian compensation Rs. 16000/- a chawi ang a, passenger hnenah a pe ang. Hei bakah hian Consumer Commission hnena zualko nana senso Rs. 8000/- Airport hian a chawi belh bawk ang. Hei hi a hma thei ang bera pek tur a ni.
Tun atan chuan he thubuai remna tawite hi kan duh tawk mai ang a . Ka sawi tum ber chu Consumer Court hi a chak tur a ni. Hnam dangho hi chuan an dikna leh chanvo an humhalh ngam hle a. Keini Mizote hi chuan kan chanvo leh kan diknate hi kan tlawmsan fo thin a ni. Mizo consumer te hi kan huaisen a hun tawh hle a ni. I harh ve ang u.
I thil lei leh hmanna a,
I lungawi loh chuan
Min hrilh la,
Kan lo pui ang che.