Thutak Nunpuitu Team-in tha takin nikum final-a an tlawmna an chhang let nghal a, zirtawpni zanah Tata SK 712 Pro Volleyball League hawn nan set hloh lovin Durtlang North an hneh.
R Dengthuama Indoor Stadium, Mualpuiah Vanlaltanchhana leh Zosangzuala’n point 30 chuang thawk chhuakin TNT an fuih phur a, 25-11, 25-21, 25-23-in an chak.
Nikum khan set thum set khatin Durtlang North an hneh lo va, a tum hnih nan final-ah TNT an tlawm. Pro Volleyball inkhel awm leh hmasa berah an intawng leh nghal a, captain Vanlalchhantluanga Sailo chuan a service hmangin point hmasa ber a hmu.
Mizo hlanga champion tum TNT-in hma lam pan chhunzawmin nikuma Mizo player tha ber lawmman dawngtu Valbuanga’n point 23 hmuin tum nga a tisual a, phu taka team a chakpui hnuah D3 Business Player of the Match lawmman hlan a ni.
An chak theih nan Zosangzuala’n point riat thawk chhuakin vawi thum a hloh a, Bawiha Sailo chuan hloh lovin point ruk a hmu bawk. TNT hian hun tepterah tel lo tura ngaih tawh setter rinrawl Lalliankima leh spiker Laldinchhunga an ko kir a, nung takin an khel tluan.
Durtlang North-in Zomuanpuia leh an elpui Chhinga Veng Spikers-a insawn ta Lalbiakmuana tel lova Pro Volleyball an khelh hmasak berah tlakchham an nei a, Karnataka captain Anup D Costa lalut mahse an insiam rem hman lo.
Chiang taka set khatna an hloh hnuah hmasawn hret mahse an hriam zo chuang lo va; set thumna tirah captain Fabian Lallunghnema’n vaw tla zawnin 6-2-in hma an hruai a, an tawn san lai ber niin mi mal leh team inelna hrang hrangah Valbuaia hovin TNT an chungnung tluan a ni.
Durtlang North tan a khelh hmasak berah Anup chuan point 18 hlawh chhuak mah se point 10 a paih a, Fabian-a’n point riat hmuin tum nga a tisual a, R Vanlalmawia’n point hnih hlohin point ruk a hmu a ni.
June 12-ah TNT-in Tuichangral an khelhpui leh dawn a, kar leh Inrinni zanah Durtlang North-in Hunthar hmaah fiahna dang an hmachhawn leh dawn a ni.
Statistics :
DURTLANG NORTH
Anup D Costa : point hmuh – 18, point hloh – 10
Fabian Lallunghnema : point hmuh – 8, point hloh – 5
Johan Vanneihsanga : point hmuh – 7, point hloh – 6
R Vanlalmawia : point hmuh – 6, point hloh – 2
TNT
Vanlaltanchhana : point hmuh – 23, point hloh – 5
Zosangzula : point hmuh – 8, point hloh – 3
Vanlalchhantluanga Sailo : point hmuh – 6, point hloh – 0
Lalhriatpuia : point hmuh – 5 , point hloh – 0
Sadrak Fanai : point hmuh – 3, point hloh – 0
Laldinchhunga : point hmuh – 3, point hloh – 2
Hmeichhe lamah Bethlehem Vengthlang an chak
Bethlehem Vengthlangin title humhim thei turin bul an tan fuh hle a, inrinni zan Tata SK 712 Pro Volleyball League hmeichhe inkhel hmasa berah 3-1-in Bungkawn an hneh.
R Dengṭhuama Indoor Stadium, Mualpuiah Elisian Medai chuan Bethlehem Vengthlang tan rin tlakin a khel a, 25-15, 17-25, 26-24, 25-20-in an chak.
Nikum final-ah Bungkawnin F Lalparmawii hovin set hmasa ber an la a; a hnuah Elisian chuan Bethlehem Vengthlang fuih phurin set thum an la zawn a, a vawi khat nan Mizoram volleyball inelna sang berah an champion.
An intawn lehna hmasa berah nikuma player tha ber Serkawn Lunglei nula Elisian hian point 25 hmuin 11 hloh mah se D3 Business Player of the Match lawmman a dawng leh nghal a ni.
June 8, Ningani chhun dar 1:30-ah Bethlehem Vengthlangin tun season-a che tha Kanan an khelhpui leh dawn a; a tuk tlai dar 3:30 atangin Bungkawn leh Durtlang an inkhel ang.
BETHLEHEM VENGTHLANG
Elisian Medai : point hmuh – 25, point hloh – 11
Lalramengi Ralte : point hmuh – 6, point hloh – 3
Lalchhandami : point hmuh – 3, point hloh – 4
VL Hmangaihzuali : point hmuh – 6, point hloh – 9
CS Zonunmawii : point hmuh – 2, point hloh – 9
BUNGKAWN
F Lalparmawii : point hmuh – 22, point hloh – 16
PC Lalrinpuii : point hmuh – 11, point hloh – 4
RK Lalfakmawii : point hmuh – 13, point hloh – 8
Lalhmingtani : point hmuh – 2, point hloh – 7