Aizawl Zoological Park (sahuan)-ah dan lova ramsa tawlhruk man, court thupek anga dah 213 a awm mek a, hengte hi India ram chhunga sahuan lian zawkten lei an dil fo.
Forest Minister TJ Lalnuntluanga leh MJA member-ten Inrinni khan sahuan hi an tlawh a, thawktuten an sawi danin dan lova ramsa tawlh ruk thuneituten an man, court thupeka sahuana dah luh tawh zawng zawng chu 931 a ni a, chung zinga 666-te erawh an thi a, sahuan atanga chhuak bo palh 52 awmin, sahuana piang 10 an awm a, tun dinhmunah ramsa 213 awm mekin, chi hrang 49 a ni.
Sahuan enkawltute chuan heng ramsa, exotic species-te hi India ram chhunga sahuan lian zawkten an awt thei hle a, a man pawh an ngam huai a, lei an dil fo tih an sawi a, chutihrual chuan court thupeka sahuana dah an nih angin court thu lo chuan an hralhchhuak thei lo a, heng ramsate hian Aizawl sahuan chu a tih-hausak phah hle tih an sawi a; chutihrual erawh chuan an hmunhmate a len tawk loh avang leh heng ramsate enkawlna tur bik sum hi budget-ah a awm loh avangin a rem rem an pawta harsa ang reng takin an enkawl chho mek tih an sawi.
Sahuan enkawltuten an sawi danin sahuanah hian keipui pathum dah an ni a, ni khatah bawngsa kg 27 an ei thin a, thla khat chhungin Rs 1,30,000 man hu vel sa an ei thin tih an sawi a. Sahuana keipui awm hi sahuan tlawhtuten an hlut hle a, keipui an dah hnu-ah hian sahuan tlawhtute pawh an pun phah nia an hriat thu an sawi bawk.
Sorkar kum kalta, April, 2022 atanga March, 2023 chhungin sahuan tlawhtu mi 50,908 awmin a luh man, lirthei dah man leh camera kenluh man atangin Rs 12,13,810 hmuhchhuah a ni a, sorkar kum kal mek April leh May thla chhungin tlawhtu 12,129 awm tawhin sum Rs 2,53,010 hmuh a nih tawh thu an sawi bawk.
Thuthar thehdarhtute hmaah Forest Minister TJ Lalnuntluanga pawhin thu sawiin Aizawl Sahuan chu a changtlung sawtin tlawhtu pawh an thahnem sawt hle a, tun hnaia Animal Exchange Program hmanga sakei pahnih dah luh a nih hnu phei chuan tlawhtu an thahnem lehzual tih a sawi.
Forest minister chuan sahuanah chuan ramsate dah luh tur awm nual mah se hmunhma zau zawk neih a nih loh avangin dah luh mai a remchang thin lo va, tun hnaiah Master Plan of Aizawl Zoological Park 2019-29 chu Central Zoo Authority-in condition neia approval a rawn pek thu sawiin, thawm that leh cheibawl ngaite cheibawla hmunhma zau zawk neih belh a nih hnu phei chuan sahuan changtlung tak a la ni dawn tih a sawi bawk.